25 
Izraeli do të përgjigjet pasi Hamasi dorëzoi mbetjet njerëzore që nuk u përkisnin pengjeve të zhdukura izraelite, gjë që Izraeli e konsideron shkelje të armëpushimit në Gaza, tha të martën kryeministri Benjamin Netanyahu.
Hamasi tha se po i përmbahej armëpushimit dhe po bënte çmos për të gjetur mbetjet e pengjeve, por u pengua nga mungesa e pajisjeve për të identifikuar trupat.
Netanyahu tha se mbetjet mortore të dorëzuara nga grupi militant gjatë natës i përkisnin një pengu, trupi i të cilit ishte gjetur tashmë nga forcat izraelite më herët gjatë luftës, dhe jo njërit prej 13 pengjeve që ende nuk janë gjetur.
Ai tha se do të mbledhë shefat e tij të mbrojtjes më vonë të martën për të vendosur mbi “hapat e ardhshëm të Izraelit” në përgjigje.
