Në vazhdën e dëshmisë së tij lidhur me ngjarjet e luftës në Kosovë, gjenerali amerikan Wesley Clark ka folur për rrezikun e dezinformimit që, sipas tij, shoqëronte çdo zhvillim gjatë asaj periudhe. Ai theksoi se komuniteti ndërkombëtar kishte qenë i vendosur që hetimet për Masakrën e Reçakut të mos kryheshin nga organet e kontrolluara nga regjimi i Sllobodan Millosheviqit.
Clark sqaroi se ekzistonte frika reale se Millosheviqi mund të tjetërsonte provat dhe të manipulonte opinionin duke paraqitur masakrën si një akt të kryer nga Ushtria Çlirimtare e Kosovës. Për këtë arsye, sipas tij, kërkesa e ndërkombëtarëve ishte që rasti t’i besohej Tribunalit Penal për Ish-Jugosllavinë.
Deklarata e tij u lexua fillimisht nga avokati Aiden Ellis, përfaqësues i Jakup Krasniqit, i cili citonte Clarkun duke thënë se manipulimi i provave nga regjimi serb ishte një rrezik i njohur dhe i përsëritur.
Duke konfirmuar qëndrimin e mëhershëm, Clark theksoi: “Ideja kryesore ishte të parandalohej Millosheviqi nga dezinformimi, ashtu siç kishte bërë edhe më parë, duke tentuar të krijonte një narrativë të rreme për situatën.”
Gjenerali amerikan foli edhe për deklaratat e tij publike gjatë luftës, ku shpesh e kishte cilësuar UÇK-në si një forcë të organizuar. Ai tha se këto deklarata kishin një qëllim të qartë strategjik, dhe se audienca e tij kryesore ishte vetë Millosheviqi, të cilit dëshironte t’i jepte përshtypjen e një force të madhe për ta shtyrë drejt dorëzimit.
“Ai më dëgjonte. Qëllimi ishte të projektoja forcë, jo të jepja një vlerësim operativ të NATO-s mbi UÇK-në,” u shpreh Clark, duke nënvizuar se përdorimi i deklaratave politike në situata konflikti është praktikë e zakonshme.
Dëshmia e Clarkut vjen në një kohë kur debati mbi Reçakun dhe rolin e propagandës së regjimit të atëhershëm vazhdon të jetë pjesë e rëndësishme e diskursit historik dhe juridik rreth luftës në Kosovë.
