Benfica ka marrë fitoren e parë në Champions League, pasi e ka mundur Ajax me rezultat 2-0, në një ndeshje ku për holandezët ka vazhduar kriza më e madhe evropiane në historinë e klubit me humbjen e tetë radhazi. Në ndeshjen tjetër të mbrëmjes, Galatasaray ka pësuar humbjen e parë pas tridhjetë e tri takimeve në “Rams Park”, duke u mposhtur 1-0 nga belgët e Union Saint-Gilloise.
Në Amsterdam, skuadra portugeze e ka zhbllokuar rezultatin që në minutën e gjashtë. Pas një goditje këndi, portieri i Ajax e ka devijuar topin, por Samuel Dahl ka goditur fort nga rreth pesëmbëdhjetë metra duke e çuar topin në rrjetë. Benfica ka vazhduar presionin, ndërsa Ajax mezi ka arritur të krijonte rrezik me vetëm një gjuajtje serioze nga Davy Klaassen.
Edhe në pjesën e dytë, Ajax ka dështuar të tregojë forcë në sulm, duke humbur raste të pastra, përfshirë një shans të madh të Klaassen. Në anën tjetër, Benfica e ka mbyllur ndeshjen në minutat e fundit me një gol të Leandro Barreiro, pas një kombinimi me Aursnes.
Ajax mbetet pa asnjë pikë dhe pa gol nga loja e hapur këtë sezon në Champions, ndërsa matematikisht ka humbur shanset për të arritur zonën e “play-off”, kurse Benfica rikthehet në garë dhe tani përgatitet për sfidën e radhës ndaj Napoli.
Në Stamboll, pavarësisht formës së mirë të turqve në Champions, ka qenë skuadra belge që ka krijuar më shumë raste në pjesën e parë. Promise David e ka pasur mundësinë më të mirë, por gjuajtja e tij nga afërsia ka shkuar ngjitur me shtyllën. Galatasaray ka reaguar me një goditje të Gabriel Sara që është përplasur në shtyllë, por edhe mysafirët e kanë goditur traversën para pushimit.
Në pjesën e dytë, Union e ka shënuar golin vendimtar në minutën e pesëdhjetë e shtatë. Pas një aksioni të shpejtë, Adem Zorgane ka asistuar për David, i cili nuk ka gabuar nga pak metra larg. Galatasaray ka tentuar ta barazojë me presion të madh në fund, por pa sukses. Davinson Snchez ka humbur një rast të pabesueshëm, ndërsa turqit kanë mbetur edhe me dhjetë lojtarë pas përjashtimit të Arda Unyay.
Me këtë fitore të madhe Union e mban gjallë shpresën për “play-off”.
Sonte nga ora 21:00 zhvillohen edhe shtatë ndeshje të tjera të Champions League
