Deputetja e PDK-së, Ganimete Musliu, ka reaguar ashpër ndaj përfaqësuesve të Lëvizjes Vetëvendosje, duke i akuzuar ata për panik dhe përpjekje për të fituar mbështetje nga mërgata në prag të zgjedhjeve të ardhshme. Në një postim të publikuar, Musliu përdori gjuhë të mprehtë dhe ironi për të kritikuar sjelljet e eksponentëve të pushtetit gjatë vizitave të tyre në diasporë.
Sipas saj, përfaqësuesit e VV-së po e përdorin festën kombëtare për qëllime elektorale, ndërsa, siç thotë ajo, “përfundojnë duke iu përgjëruar mërgatës për shpëtim”. Deputetja Musliu i akuzon zyrtarët e Vetëvendosjes se nuk tregojnë respekt për vlerat dhe ritet kombëtare, duke përfshirë festat, ceremonitë familjare dhe rolin historik të diasporës.
Në reagimin e saj ajo i quan përfaqësuesit e VV-së “mashtrues dhe manipulues”, duke i akuzuar se po shkatërrojnë shpresën dhe të ardhmen e vendit.
Komentet e Musliut vijnë në një periudhë tensionesh politike, ku partitë po intensifikojnë komunikimet me mërgatën dhe elektoratin në prag të zgjedhjeve të jashtëzakonshme të 28 dhjetorit.
