Gjykata Supreme e SHBA-së ka rënë dakord të dëgjojë një çështje nëse e drejta kushtetuese shekullore e shtetësisë së garantuar për ata që kanë lindur në SHBA do të mbetet në fuqi.
Sipas mediave të huaja, në ditën e tij të parë në detyrë në janar, Presidenti Donald Trump nënshkroi një urdhër për t’i dhënë fund shtetësisë sipas të drejtës së lindjes, por ky vendim u bllokua nga gjykatat e shkallës së pare, pasi u kundërshtua për kushtetutshmërinë e tij.
Vendimi përfundimtar i Gjykatës së Lartë ose do të mbështesë të drejtat e shtetësisë për fëmijët e emigrantëve që janë në SHBA ilegalisht ose me viza të përkohshme, ose do t’i japë fund kësaj.
Më pas, gjyqtarët do të caktojnë një datë për të dëgjuar argumentet me gojë midis qeverisë dhe paditësve, të cilët përfshijnë prindër emigrantë dhe foshnjat e tyre.
Për gati 160 vjet, Amendamenti i 14-të i Kushtetutës së SHBA-së ka vendosur parimin se kushdo që lind në vend është shtetas amerikan, me përjashtime për fëmijët e lindur nga diplomatë dhe forca ushtarake të huaja.
Në tekstin e amendamentit thuhet: “Të gjithë personat e lindur ose të natyralizuar në Shtetet e Bashkuara dhe që i nënshtrohen juridiksionit të tyre, janë qytetarë të Shteteve të Bashkuara”.
