Kryeprokurori i Prokurorisë Themelore në Prizren, Petrit Kryeziu, në një konferencë për media, ka folur për aksionin e sotëm që u zhvillua sot në Kosovë nën dyshimet për keqpërdorime në Byronë Kosovare të Sigurimeve.
Ai tha se dëmi i shkaktuar është 1 milionë e 43 mijë euro.
“Aksionit të sotëm i kanë paraprirë veprime hetimore të shumta nga marsi i vitit 2025 kur jemi ngarkuar me këtë rast. Duke e para ndërlikueshëmrinë faktike, juridike, procedurale kam vendosur që t’i angazhojë dy prokurorë dhe së bashku me ta kanë punuar drejtoria e krimeve ekonomike në Prishtinë.”
“Po flasim për një rast ku sot kemi marrë urdhëresë nga gjykata për bastisje të 47 personave, në mesin e tyre një person juridik. Këtij aksioni i ka paraprirë edhe aplikimi i masave të veçanta hetimore. Bëhet fjalë për keqpërdorimet në Byronë Kosovare të Sigurimeve. Cak i hetimeve janë ish drejtori ekzekutiv i BKS’së dhe ish drejtori i departamentit të financave të BKS, të cilët duke i keqpërdorur autorizimet që iu kanë besuar nga BKS iu kanë mundësuar personave të ndryshme dhe vetvetes të bartin transaksione t ndryshme ku kanë arritur përfitime për vete dhe i kanë shkaktuar dëme të mëdha BKS’së. Po ashtu kanë keqpërdorur autorizimet ekonomike dhe kanë përpiluar dokumente të falsifikuara”, tha ai
