Inteligjenca artificiale (IA) po ndryshon me shpejtësi mënyrën se si diagnostikohen dhe trajtohen sëmundjet. Duke njohur modele në analiza mjekësore dhe imazhe, IA mund të identifikojë pacientë me rrezik për kancer, sëmundje të zemrës, komplikacione të diabetit dhe probleme të shëndetit mendor.
Sistemet e trajnuara me IA tashmë mund të barazohen ose edhe t’i kalojnë radiologët në zbulimin e kancerit përmes rrezeve X të kraharorit, mamografive, rezonancave magnetike dhe skanimeve CT. Ato nuk i zëvendësojnë mjekët, por shërbejnë si një “palë sy shtesë”, duke sinjalizuar zona të dyshimta për rishikim.
Sipas profesor Anant Madabhushit nga Universiteti Emory në SHBA, një nga përdorimet më premtuese të IA-së është analiza e imazheve mjekësore për të zbuluar modele që mund t’i shpëtojnë syrit të njeriut. Kjo ndihmon në zbulimin më të hershëm të sëmundjeve dhe në parashikimin se cilët pacientë do të përfitojnë më shumë nga trajtime të caktuara.
IA-ja po ndihmon edhe përtej diagnostikimit. Studiues në Universitetin Charles Darwin kanë krijuar një model që analizon video të ekografisë së mushkërive dhe diagnostikon pneumoni, COVID-19 dhe sëmundje të tjera respiratore me 97% saktësi.
Teknologjia po kursen gjithashtu kohë dhe para për pacientët. Sisteme si IDx-DR mund të zbulojnë sëmundje të syrit te diabetikët direkt në klinikën e mjekut të familjes, ndërsa Heartflow analizon sëmundjet e zemrës pa procedura invazive.
Në kërkimin farmaceutik, IA-ja po shkurton ndjeshëm kohën e zhvillimit të barnave, duke analizuar shpejt të dhëna masive dhe duke përzgjedhur molekula premtuese.
Edhe pse vendimet finale mbeten në duart e profesionistëve shëndetësorë, IA-ja po i ndihmon ata të marrin vendime më të sakta dhe më të personalizuara. Ajo nuk i zëvendëson mjekët, por punon krah tyre, duke shënuar fillimin e një revolucioni global në shëndetësi.
