Qeveria e Kosovës mban mbledhje elektronike, merr vendim për shpronësime për nevoja të KEK-ut

Qeveria e Republikës së Kosovës, ka zhvilluar sot në mënyrë elektronike mbledhjen e radhës, në të cilën u mori dy vendime.

Sipas njoftimit të Qeverisë, në mbledhjen e sotme është miratuar vendimi përfundimtar për shpronësim për interes publik të  pronave të paluajtshme të  cilat preken nga realizimi i Projektit për zgjerimin e mihjes sipërfaqësore për eksploatim të thëngjillit për prodhim të energjisë elektrike për nevoja të Korporatës Energjetike të Kosovës (Sh. A.).

Gjithashtu është miratuar kërkesa e Ministrisë së Arsimit, Shkencës, Teknologjisë dhe Inovacionit për shpenzimin e mjeteve buxhetore në shumën prej 270,000 euro, me qëllim të mbështetjes financiare për Kolegjin Publik Ndërkombëtar të Biznesit (IBCM).