Posteri zyrtar i Kupës së Botës 2026 është prezantuar si pjesa e fundit e koleksionit të posterave të turneut, duke kombinuar elementë përfaqësues nga tre vendet organizatore: Kanadaja, Meksika dhe Shtetet e Bashkuara të Amerikës.
Me këtë publikim, përmbyllet seria e 16 posterave zyrtarë të qyteteve organizatore, të prezantuar gjatë vitit 2025. Turneu i këtij viti do të shënojë një rekord me 104 ndeshje, duke nisur më 11 qershor në stadiumin e qytetit të Meksikos dhe duke përfunduar me finalen më 19 korrik në stadiumin e Nju Jorkut.
Posteri paraqet një kompozim në formë kolazhi, me një lojtar futbolli në qendër, duke synuar të reflektojë aftësinë e sportit për të bashkuar kultura dhe kombe të ndryshme. Sipas FIFA-s, për herë të parë në historinë e Kupës së Botës, tre artistë kanë bashkëpunuar për krijimin e posterit zyrtar të turneut.
Artisti kanadez Carson Ting, artistja meksikane Menerva GM dhe artisti amerikan Hank Willis Thomas kanë kombinuar stilin dhe qasjen e tyre krijuese për të realizuar një vepër që thekson lidhjen dhe unifikimin përgjatë turneut.
Në një deklaratë zyrtare, Presidenti i FIFA-s, Xhani Infantino, tha se brenda 100 ditësh organizata do të mirëpresë botën në Amerikën e Veriut për “shfaqjen më të madhe në tokë”.
Sipas tij, posteri zyrtar i Kupës së Botës 2026 “kap energjinë, diversitetin dhe pasionin e përbashkët” që pritet të karakterizojnë edicionin më gjithëpërfshirës në historinë e turneut. Ai theksoi se nga ndeshja e parë deri në finalen e madhe, miliarda tifozë në stadiume dhe në mbarë globin do të përjetojnë momente që, sipas tij, “tejkalojnë futbollin”, duke bashkuar kultura dhe duke festuar unitetin në një skenë globale.
