Patrullat sikur ishin zhdukur pas vdekjes së Mahsa Aminit
Dhjetë muaj pas vdekjes së 22-vjeçares kurdo-iraniane Mahsa Amini, ndërsa ishte ndalua nga oficerët për mosmbajtjen e saktë të shamisë, patrullat e policisë morale kthehen në Iran për të sanksionuar gratë që nuk mbajnë hixhabin në vende publike.
Njoftimi u bë nga zëdhënësi i policisë Saeed Montazermahdi, i cituar nga televizioni shtetëror: “Ata që nuk respektojnë rregullat do të trajtohen dhe ndiqen penalisht nga gjyqësori”, paralajmëroi ai.
Ditët e fundit, në mediat sociale janë publikuar foto dhe video ku shihen femrat e policisë me çadrë që këshillojnë dhe arrestojnë gratë që nuk mbajnë mbulesë, raportoi France Presse, duke shtuar megjithatë se nuk mund të verifikonte vërtetësinë e imazheve të postuara.
E përditshmja reformiste Shargh raportoi se katër gra u urdhëruan të “merrnin kurse në psikologji”, “të pastrojne spitalet” dhe iu “ndalua drejtimi i automjetit për dy vjet”.
Patrullat, të krijuara pas Revolucionit Islamik të vitit 1979, kishin qëndruar të heshtura pas vdekjes së Mahsa, një ngjarje tragjike që kishte shkaktuar një valë të paprecedentë protestash në të gjithë vendin, me demonstrata të shtypura përgjakësisht në disa qytete, veçanërisht në tetor dhe nëntor, në duke ngritur në të njëjtën kohë hutimin e diplomatëve perëndimorë.
Qindra njerëz, përfshirë anëtarë të forcave të sigurisë, u vranë dhe mijëra u arrestuan, ndërsa shtatë burra u ekzekutuan për përfshirjen e tyre në lëvizje.
Që nga 16 shtatori i vitit të kaluar, gjithnjë e më shumë gra kanë dalë te pambuluara, veçanërisht në Teheran dhe në qytetet e mëdha. Më pas, që nga fillimi i vitit, autoritetet kanë filluar të tregojnë sërish grushtin e tyre të ashpër me një goditje të re, për shembull duke instaluar kamera në rrugë për të gjurmuar gratë që kundërshtuan ndalimin.
Gjyqësori dhe qeveria gjithashtu lëvizën paralelisht dhe në maj propozuan një projekt-ligj të quajtur “Mbështetje për kulturën e hixhabit dhe dëlirësisë” për “mbrojtjen e shoqërisë” dhe “forcimin e jetës familjare”.
Ky tekst, i cili ka ndezur një debat të gjallë, sugjeron forcimin e sanksioneve, veçanërisht atyre financiare, ndaj “kujtdo që heq mbulesën në vende publike ose në internet”.
Dy muaj para fillimit të protestës, në korrik 2022, presidenti ultra-konservator Ebrahim Raïsi kishte propozuar mobilizimin e “të gjitha institucioneve për të forcuar ligjin për mbulesën”, duke deklaruar se “armiqtë e Iranit dhe Islamit donin të minonin vlerat kulturore dhe fetare të shoqërisë”.
