Kosova është përballur me një javë të rëndë ku katër persona kanë humbur jetën në tri raste të ndara brenda vetëm shtatë ditësh, duke ngritur shqetësime për gjendjen e sigurisë publike në vend.
Rasti i parë u shënua të hënën e kaluar në Gjakovë, ku një 38-vjeçar humbi jetën në orët e para të mëngjesit si pasojë e plagosjes me armë zjarri. Në të njëjtin incident mbeti i plagosur edhe një 29-vjeçar. Autori i dyshuar ishte në arrati për disa orë, por më pas u dorëzua pranë organeve të rendit.
Ngjarja e dytë ndodhi të shtunën, ku një konflikt mes dy vëllezërve përfundoi tragjikisht me vdekjen e njërit prej tyre. Lidhur me këtë rast, autoritetet kanë arrestuar një person, ndërsa hetimet janë në vijim.
Rasti i tretë dhe më i fundit ndodhi në fshatin Majac të Podujevë, ku një grua dyshohet se ka qëlluar për vdekje një burrë. Gjatë kësaj ngjarjeje mbeti e plagosur rëndë edhe një grua 73-vjeçare, e cila ndërroi jetë mëngjesin e së hënës në Qendra Klinike Universitare e Kosovës si pasojë e plagëve të marra.
Këto ngjarje të njëpasnjëshme kanë tronditur opinionin publik dhe kanë shtuar thirrjet për masa më të forta në drejtim të sigurisë dhe parandalimit të krimeve të rënda. Autoritetet kompetente kanë bërë të ditur se hetimet për secilin rast po vazhdojnë, me synim zbardhjen e plotë të rrethanave dhe vënien e përgjegjësve para drejtësisë.
