Përfaqësues të komunitetit shqiptaro-amerikan, të udhëhequr nga anëtarë të Bordit të Këshillit të Marrëdhënieve Shqiptaro-Amerikane (AARC), kanë zhvilluar një takim me kryetaren e Konferencës Republikane në Dhomën e Përfaqësuesve, Lisa McClain.
Sipas një njoftimi të publikuar nga AARC, gjatë takimit Presidenti i Këshillit, Martin Vulaj, propozoi riaktivizimin dhe mobilizimin e Kaukusit Shqiptar në Kongresin Amerikan.
“Kryetarja McClain e mirëpriti iniciativën, duke shprehur mbështetjen e saj dhe duke premtuar se do të marrë pjesë aktivisht në përpjekjet për t’i dhënë një fokus dhe koordinim të ri këtij kaukusi. Një veprimtari pritet të organizohet në të ardhmen e afërt për të mbledhur të gjithë anëtarët e kaukusit në një sesion të gjerë të përqendruar në informimin mbi rajonin dhe në harmonizimin strategjik”, thuhet në njoftim.
Sipas njoftimit, kryetarja McClain theksoi rëndësinë e paraqitjes së zgjidhjeve konkrete krahas identifikimit të sfidave, duke vënë në dukje se përparimi në Uashington kërkon si përcaktim të qartë të problemeve, ashtu edhe një rrugë strategjike përpara.
Një pikë qendrore e diskutimit ishte dialogu në vazhdim ndërmjet Kosovës dhe Serbisë.
Vulaj theksoi se njohja reciproke midis Kosovës dhe Serbisë duhet të mbetet synimi përfundimtar i deklaruar i çdo marrëveshjeje mes dy vendeve. U theksua gjithashtu se udhëheqja e Evropës në këtë proces ka qenë e dobët dhe joefektive, dhe se roli drejtues i Shteteve të Bashkuara është i domosdoshëm për një rezultat të suksesshëm.
“Rëndësia strategjike e anëtarësimit të Kosovës në NATO u theksua fuqishëm. Pjesëmarrësit nënvizuan se integrimi i Kosovës në NATO është thelbësor jo vetëm për sigurinë e saj dhe stabilitetin e Ballkanit Perëndimor, por edhe për avancimin e interesave kombëtare amerikane. Siç u diskutua, rajoni mbetet thellësisht i ndërlidhur, ku zhvillimet politike në një vend ndikojnë drejtpërdrejt në shtetet fqinje. Anëtarësimi i Kosovës në NATO do të shërbente si një garanci e rëndësishme kundër zgjerimit të ndikimit rus dhe kinez në rajon”, thuhet në njoftim.
Sipas njoftimit, në takim u ngritën gjithashtu shqetësime shtesë lidhur me të drejtat e shqiptarëve në mbarë rajonin.
Vehbi Bajrami, botues i gazetës “Illyria” dhe ish-shef i Seksionit të Gjuhës Shqipe në “Zërin e Amerikës”, foli për shkeljen sistematike të të drejtave të pakicës shqiptare në Serbi, duke bërë thirrje për trajtim të barabartë dhe barazi me të drejtat që u garantohen serbëve në Kosovë. Ai, sipas njoftimit, preku edhe çështjen kritike të pasivizimit të adresave.
Kryetari i Bordit të AARC, Eli Rusi, theksoi sfidat e vazhdueshme në Maqedoninë e Veriut, sidomos në lidhje me zbatimin e Marrëveshjes së Ohrit dhe mungesën e zbatimit të plotë të të drejtave gjuhësore për studentët shqiptarë në arsimin juridik, pavarësisht se këto dispozita janë të përfshira në kushtetutën e vendit.
Takimi përfundoi me një angazhim të përbashkët për bashkëpunim të vazhdueshëm, avokim strategjik dhe avancimin e politikave që promovojnë stabilitetin, barazinë dhe zhvillimin demokratik në gjithë Ballkanin Perëndimor.
Ndër të pranishmit ishin edhe Kryetari i Partisë Republikane në shtetin e Nju Jorkut, Edward Cox, si dhe ish-ndihmësi i Presidentit Clinton, Christopher Hyland. Cox, i cili është gjithashtu dhëndri i ish-Presidentit Richard Nixon, ishte folës i ftuar në darkën vjetore të AARC. Hyland ka ndërtuar një marrëdhënie të fortë me komunitetin shqiptar që nga koha kur shërbeu si Zëvendës Drejtor Kombëtar Politik për Çështjet e Komuniteteve Etnike i fushatës presidenciale të Bill Clinton-it në vitin 1992.
Kryetarja e Konferencës Republikane në Dhomën e Përfaqësuesve për Kongresin e 119-të, Lisa McClain, shërben gjithashtu si bashkëkryetare e Kaukusit për Çështjet Shqiptare në Dhomën e Përfaqësuesve.
Ajo përfaqëson Distriktin e 9-të të Michiganit dhe është anëtare e Komisionit për Shërbimet Financiare dhe e Komisionit për Arsimin dhe Forcën e Punës. Me përvojën e saj të fortë në biznes dhe angazhimin për të ndërtuar lidhje të forta me zgjedhësit e saj, ajo ka mbajtur për shumë vite një marrëdhënie pune me komunitetin shqiptaro-amerikan
