Mbi 200 persona dyshohen për përfshirje në manipulim dhe falsifikim të rezultateve zgjedhore në Pejë, në kuadër të zgjedhjeve të mbajtura më 28 dhjetor.
Sipas Prokurorisë Themelore në Pejë, pritet të dorëzohen gjithsej 31 kallëzime penale që lidhen me këto raste. Lajmin e ka konfirmuar zëdhënësi i kësaj prokurorie, Shkodran Nikçi.
Sipas autoriteteve, rastet kanë të bëjnë me ndërhyrje në procesin e numërimit dhe evidentimit të votave. Të dyshuarit përfshijnë kryesues dhe komisionerë të angazhuar në procesin zgjedhor, për të cilët ekzistojnë dyshime për keqpërdorime gjatë administrimit të votave.
Prokuroria ka bërë të ditur se hetimet janë zhvilluar mbi bazën e dyshimeve për parregullsi në menaxhimin e votave, ndërsa tashmë rasti ndodhet në fazën e procedimit të kallëzimeve penale përkatëse.
Autoritetet nuk kanë dhënë ende detaje të plota mbi veprimet konkrete që dyshohet se janë kryer, por kanë theksuar se hetimet po vazhdojnë për zbardhjen e plotë të rastit dhe identifikimin e përgjegjësve.
Ndërkohë, raste të ngjashme për manipulim votash janë raportuar edhe më herët në këtë komunë, duke ngritur shqetësime të vazhdueshme për integritetin dhe besueshmërinë e procesit zgjedhor në nivel lokal.
