Rusia në një seri sulmesh ajrore intensive në të gjithë Ukrainën gjatë natës ka dëmtuar infrastrukturën kritike të portit në Ukrainën jugore, duke përfshirë terminalet e grurit dhe naftës. Si pasojë e sulmeve janë plagosur të paktën 12 persona, kanë bërë të ditur zyrtarët ukrainas të mërkurën.
Sulmi ajror kishte në shënjestër portin e Odesës për të dytën natë radhazi, disa ditë pasi presidenti rus Vladimir Putin njoftoi se Moska do të ndalonte pjesëmarrjen e saj në marrëveshjen e cila mundësonte që eksportet e rëndësishme të grurit të arrijnë në botë, duke përfshirë shumë vendet që përballen me kërcënimin e urisë, raporton agjencia AP.
Mbetjet nga raketat dhe dronët që u rrëzuan ranë në ndërtesa banimi, resorte bregdetare e depo, duke shkaktuar zjarre dhe duke plagosur disa njerëz.
Të paktën gjashtë banorë të Odesës, përfshirë një djalë 9-vjeçar, kanë kërkuar ndihmë mjekësore, për shkak të plagëve të shkaktuara nga thyerja e xhamit dhe objekteve të tjera.
Ndërkohë, zyrtarët rusë të emergjencës në Krime kanë bërë të ditur se më shumë se 2200 njerëz u evakuuan nga katër fshatra për shkak të një zjarri në një objekt ushtarak. Zjarri shkaktoi gjithashtu mbylljen e një autostrade të rëndësishme.
