Ushtria izraelite ka nisur sulme të reja në jug të Libanit, ndërsa ka lëshuar edhe një urdhër të rrallë evakuimi për lagjen e krishterë të qytetit historik të Tyre.
Zëdhënësi i ushtrisë izraelite, Avichay Adraee, u bëri thirrje banorëve të Tyre-s dhe zonave përreth që të largohen menjëherë. Në një postim në rrjetin X, ai deklaroi se “për shkak të shkeljes së marrëveshjes së armëpushimit nga Hezbollah dhe sulmeve të saj ndaj territorit izraelit, Forcat e Mbrojtjes së Izraelit janë të detyruara të veprojnë me forcë kundër tyre”.
Urdhrat e mëparshëm të evakuimit nuk e kishin përfshirë lagjen e krishterë, por kjo është hera e dytë që ushtria izraelite pretendon se Hezbollah po vepron nga kjo zonë dhe se ajo mund të bëhet objektiv i sulmeve.
Paralajmërimi erdhi pasi agjencia shtetërore libaneze e lajmeve raportoi për sulme të reja të martën në një kompleks banimi publik në Tyre. Ekipet e shpëtimit, që po kërkonin persona të zhdukur, kanë gjetur edhe një trup tjetër.
Sipas autoriteteve libaneze, të paktën pesë persona u vranë dhe tetë të tjerë u plagosën nga një sulm ajror në Tyre të hënën.
Sulmet e fundit vijnë pavarësisht një armëpushimi të ndërmjetësuar nga SHBA-të midis qeverive të Izraelit dhe Libanit.
Hezbollah nuk është palë në marrëveshjen e armëpushimit dhe ka deklaruar se nuk e njeh atë për aq kohë sa ushtria izraelite vazhdon të qëndrojë në territorin libanez.
Izraeli ka argumentuar se evakuimi i Tyre-s, qytet bregdetar në veri të zonave të kontrolluara nga forcat izraelite, është i nevojshëm për shkak të shkeljeve të armëpushimit nga Hezbollah, shkruan CNN.
