Deputeti i zgjedhur i PDK-së, Eman Rrahmani, ka përjashtuar në mënyrë kategorike mundësinë e një koalicioni mes PDK-së dhe Lëvizjes Vetëvendosje, duke thënë se nuk do ta mbështesë një bashkëpunim të tillë në asnjë rrethanë.
Në Debat Plus, Rrahmani tha se qeverisja aktuale ka dështuar gjatë gjashtë viteve të fundit dhe, sipas tij, nuk ka sjellë përmirësim të dukshëm për qytetarët.
“Eman Rrahmani nuk ka votë për koalicion PDK-LVV në asnjë mënyrë e asnjë rrethane. Unë mendoj që ky pushtet për 6 vjet e ka dëshmuar që nuk ka ndonjë dobi. Dhe është jashtëzakonisht e dobishme dhe për VV-ne edhe për vendin që këta të shkojnë në opozitë”, ka thënë Rrahmani.
Sipas rezultateve aktuale, Lëvizja Vetëvendosje ka fituar 53 ulëse në Kuvend, PDK 22, LDK 18 dhe AAK 7, ndërsa Komisioni Qendror i Zgjedhjeve ka bërë të ditur se shpallja e rezultateve përfundimtare po varet nga përfundimi i shqyrtimit të ankesave dhe procedurave ligjore në institucionet përkatëse.
