Presidenti turk Recep Tayyip Erdogan la të kuptohet sot se beson se një marrëveshje është afër për blerjen nga Ankaraja të avionëve luftarakë amerikanë F-35 dhe motorëve të prodhuar në SHBA për avionët luftarakë KAAN, projekti kryesor i Turqisë.
Duke folur për F-35 gjatë takimit të tij dypalësh me presidentin amerikan Donald Trump, Erdogan tha se Turqisë “i janë premtuar pesë avionë”, raporton CNN.
“Ne besojmë se presidenti Trump ka bërë gjithashtu një premtim të veçantë për këtë… dhe shpresojmë që lajmet që kemi marrë më herët të provohen të dobishme për të ardhmen”, tha udhëheqësi turk.
“Presidenti Trump ka qenë gjithmonë një njeri që e mban fjalën dhe shpresoj që, sa i përket F-35, të kemi një rezultat të frytshëm dhe një vendim nga ky samit i liderëve”, shtoi ai.
Duke folur për motorët e prodhuar në SHBA për avionët KAAN të Turqisë, Erdogan tha se beson që Trump “na ka dhënë disa lajme të mira dhe besoj se ai do t’i përsërisë ato lajme të mira, dhe mendoj se me këto lajme të mira, me gjasë, do ta falënderojë gjatë këtij samiti”.
Trump tha se së shpejti do të vendosë nëse do t’ia shesë Turqisë avionët, pavarësisht ndalimit nga Kongresi. Ai gjithashtu tha se do t’i heqë sanksionet e vendosura ndaj Turqisë për shkak të blerjes së një sistemi rus të mbrojtjes ajrore.
