Drejtori i Drejtorisë për Ekonomi në Prizren, Levent Bush, në një deklaratë për RTK, edicionin në gjuhën turke, ka thënë se pretendimet e ngritura ditëve të fundit për vëllain e tij, Shahin Bush, janë të pavërteta.
Ai gjithashtu ka mohuar se vëllai i tij është arrestuar apo ndaluar.
Levent Bush ka treguar se vëllai i tij ka shkuar në Prokurorinë e Prizrenit, ku ka dorëzuar kallëzim penal lidhur me pretendimet e ngritura ndaj tij.
Ai ka thënë gjithashtu se personi që shfaqet në pamjet e transmetuara nga disa televizione, të cilat e lidhin me grupet paramilitare serbe në vitin 1999, nuk është vëllai i tij, Shahin Bush, duke i cilësuar këto pretendime si krejtësisht të pavërteta.
Ai ka thënë për RTK se vëllai i tij ndodhet aktualisht në shtëpi dhe u bëri thirrje qytetarëve të mos u besojnë lajmeve që, sipas tij, nuk pasqyrojnë realitetin dhe bazohen në pretendime të pabazuara.
