Mediat shtetërore të Koresë Veriore njoftuan se Ministri rus i mbrojtjes është takuar me liderin e Koresë së Veriut Kim Jong Un në një ekspozitë të mbrojtjes ku janë ekspozuar raketat e ndaluara balistike.
Ministri rus Sergei Shoigu dhe një delegacion kinez i kryesuar nga një anëtar i Byrosë Politike të Partisë Komuniste mbërritën në Korenë e Veriut këtë javë për 70-vjetorin e përfundimit të Luftës Koreane, e e cila në Korenë e Veriut festohet si “Dita e Fitores”.
Raketat me aftësi bërthamore të cilat u ekspozuan nga Kim Jon Un u ndaluan me rezolutat e Këshillit të Sigurimit të OKB-së të miratuara edhe me mbështetjen ruse dhe kineze. Megjithëatë, këtë javë, këto raketa dhanë një sfond të mrekullueshëm për një shfaqje solidariteti nga tre vende të bashkuara rivale me SHBA-në dhe një ringjallje e asaj që disa analistë e shohin si koalicionin e tyre të kohës së Luftës së Ftohtë.
Vizita e Shoigut ishte e para e një ministri rus të mbrojtjes në Korenë e Veriut që nga shpërbërja e Bashkimit Sovjetik në vitin 1991.
Për Korenë e Veriut, ardhja e delegacioneve ruse dhe kineze shënon hapjen e parë të madhe ndaj botës që nga pandemia COVID-19.
Shoigu i dha Kimit një letër nga presidenti rus Vladimir Putin, raportuan mediat koreano-veriore.
“(Kim) shprehu pikëpamjet e tij për çështjet e interesit të ndërsjellë në luftën për të mbrojtur sovranitetin, zhvillimin dhe interesat e të dy vendeve nga praktikat arbitrare të imperialistëve dhe për të realizuar drejtësinë dhe paqen ndërkombëtare”, u tha nga mediet e Koresë veriore.
Agjencia shtetërore e mediave “KCNA” nuk iu referua luftës në Ukrainë, por ministri i mbrojtjes i Koresë Veriore, Kang Sun Nam, u raportua të ketë thënë se Pheniani mbështet plotësisht “betejën” e Rusisë për drejtësi dhe mbrojtjen e sovranitetit të saj.
“Ne kemi bërë një rrugë të gjatë nga koha kur Koreja Veriore do të shmangte shfaqjen e aftësive të saj bërthamore kur personalitete të larta të huaja nga Rusia dhe Kina ishin në qytet,” tha Ankit Panda e Fondacionit Carnegie me qendër në SHBA për Paqen Ndërkombëtare, duke e quajtur turneun ” jashtëzakonshme”.
“Udhëtimi personal për Shoigu – dhe gatishmëria e Shoigut për t’u fotografuar me Kim gjatë këtij turneu – është dëshmi se Moska është e vetëkënaqur me modernizimin e vazhdueshëm bërthamor të Koresë Veriore,” tha ai.
Kim u takua gjithashtu me anëtarin e Byrosë Politike të Partisë Komuniste Kineze Li Hongzhong për bisedime dhe iu dorëzua një letër nga presidenti kinez Xi Jinping, raportuan mediat koreano-veriore.
Vizita e delegacionit të Li-së tregoi përkushtimin e Xi-t ndaj miqësisë Kore-Kinë, u citua të ketë thënë Kim nga agjencia shtetërore e lajmeve e Veriut, KCNA. (Burimi: Reuters)
