Luka Modriç e regjistroi paraqitjen e tij të 203-të me fanellën e Kroacisë në ndeshjen ndaj Republikës Çeke, të cilën kroatët e fituan 2-1.
Mesfushori 41-vjeçar ishte protagonist edhe me gol, duke shënuar me një goditje të fuqishme dhe duke arritur në kuotën e 30 golave me përfaqësuesen.
Pas ndeshjes, Modriç foli për kanalet zyrtare të Federatës Kroate të Futbollit,
“Është bukur të shënosh sërish gol. Jam i lumtur. Kisha shënuar kur Slaven kishte debutuar për herë të parë ndaj Italisë, u riktheva dhe shënova përsëri, kështu që nuk është keq. Por, sigurisht, jam edhe më i lumtur për fitoren”, deklaroi Modriç.
Modriç flet për trajnerin e ri
Kroacia drejtohet tashmë nga Slaven Biliç dhe Modriç e vlerësoi ndikimin e trajnerit të ri.
“Është ende shumë herët për të nxjerrë përfundime, por gjithçka është shumë pozitive. Kur një trajner i ri e merr drejtimin e kombëtares, të gjithë duan të japin më shumë: më shumë energji, dëshirë dhe vendosmëri.”
“Nuk po them se këto gjëra nuk ekzistonin më parë, por që nga ardhja e trajnerit të ri janë bërë edhe më të dukshme. Ka disa gjëra që ai i pret nga ne dhe do të na duhet kohë për t’i përsosur të gjitha. Gjithçka bëhet më e lehtë kur fiton.”
Ishte e rëndësishme të fitonim dhe tani duhet të vazhdojmë. Besoj se do të përpiqemi t’i përsërisim këto aspekte pozitive në ndeshjen e ardhshme dhe t’i minimizojmë ato negative, sepse do të përballemi me një nga skuadrat më të mira në botë.”
Përballja me Spanjën
Kroacia tani do të përballet me Spanjën, kampionen në fuqi të botës.
“E pamë rezultatin e tyre në Londër. Fakti që shkuan në Wembley dhe fituan 3-2 e tregon cilësinë e tyre. Është padyshim njëra nga skuadrat më të mira në botë dhe një test shumë i mirë për ne, për të parë se ku jemi në raport me skuadrën më të mirë në botë.”
“Por edhe ne i kemi cilësitë tona dhe trajneri me siguri do ta përgatisë ndeshjen në mënyrën më të mirë të mundshme, se si të përballemi me ta dhe si të luajmë.”
“Ne duhet ta bëjmë lojën tonë, si gjithmonë. Nuk duhet të përshtatemi me askënd, pavarësisht nëse bëhet fjalë për Spanjën. Nuk e kemi bërë kurrë këtë dhe nuk besoj se do ta bëjmë as tani. E presim një ndeshje të madhe dhe shpresoj që të jemi në nivelin e duhur”, përfundoi Modriç.
