Kylian Mbappe ka qenë lojtari më i spikatur i Real Madridit këtë sezon, por francezi aktualisht është jashtë fushave pasi pësoi një lëndim në gju gjatë grumbullimit me kombëtaren.
Sulmuesi po e zhvillon rikuperimin larg Madridit, një vendim që ka ngritur disa pikëpyetje.
Dhe kjo ka bërë që disa të bëjnë një lidhje me komentet e fundit të Jose Mourinhos për sjelljen e lojtarëve.
Sipas “Diario SPORT”, ndërsa shumica e bashkëlojtarëve të lënduar të Mbappes kanë vazhduar rehabilitimin në Valdebebas, francezi ka ndjekur planin e tij jashtë kryeqytetit spanjoll.
Mbappe, i cili u largua nga grumbullimi i Francës gjatë pushimit ndërkombëtar për shkak të një hiper-ekstensioni të gjurit të majtë, ka dokumentuar rikuperimin e tij në rrjetet sociale.
Të dielën, ai publikoi disa postime ku shihej duke vrapuar në një tapet vrapimi dhe duke ngarë biçikletë, me vargjet “Kush është shumë i keq? I ligu” të vendosura mbi pamjet.
Postimet janë interpretuar në mënyra të ndryshme, në varësi të kontekstit, me disa që i kanë lidhur ato me deklaratat e fundit të Mourinhos.
Portugezi kishte folur disa javë më parë për aktivitetet që mendon se lojtarët duhet t’i shmangin.
“Nuk mund të shkosh për ski në male, nuk mund të ngasësh biçikletë. Nëse e bën, madje edhe duke u fshehur nga klubi, nuk më interesojnë aq shumë kontratat, por imazhi që jep,” kishte thënë Mourinho.
“Rrëzohesh nga biçikleta dhe mund të mungosh në tri ndeshje, ose edhe më keq, mund të thyesh këmbën. Mund të marrësh vetëm një goditje, por kjo mund të përkeqësohet dhe të të largojë nga forma jote më e mirë,” shtoi ai.
Duke pasur parasysh këtë sfond, pamja e Mbappes duke ngarë biçikletë si pjesë e rikuperimit të tij në mënyrë të pashmangshme nxiti spekulime nga një pjesë e tifozëve.
Megjithatë, vlen të theksohet se Mbappe udhëtoi drejt Parisit dhe Zvicrës me lejen e klubit.
Mbappe pritet të rikthehet në aksion kur Real Madridi të rifillojë fushatën e tij. Me ekipin që ndodhet gjashtë pikë prapa Barcelonës, paraqitjet e francezit do të jenë kyçe kur sezoni të rifillojë.
