Avokati i Erion Veliajt, Plarent Ndreca, ka bërë me dije se kryebashkiaku i Tiranës është transferuar në ambientet spitalore të burgut të Fierit, për shkak të frakturës në këmbë, e cila kërkon ende trajtim mjekësor dhe rikuperim.
Përmes një reagimi pas takimit me Veliajn, Ndreca deklaron se prej afro dy javësh kanë kërkuar zyrtarisht kryerjen e një ekzaminimi për të vlerësuar ecurinë e shërimit të frakturës, por deri më tani ai nuk është realizuar, pavarësisht kërkesave dhe udhëzimeve të mjekut që ndjek rikuperimin e tij.
Avokati bëri të ditur gjithashtu se Veliaj i ka dorëzuar disa faqe të shkëputura nga ditari i tij personal, ku ka shënuar përgjigjet që i ka komunikuar ministrit të Drejtësisë Toni Gogu lidhur me kërkesat e bëra ndaj tij. Sipas Ndrecës, këto përgjigje do të bëhen publike.
Vetëm disa ditë më parë, Veliaj bëri publike se Gogu e kishte vizituar në qeli, për t’i përcjellë, sipas tij, disa mesazhe nga kryeministri Edi Rama në lidhje me dorëzimin e pushtetit dhe kërkesa të tjera.
Reagimi i plotë i avokatit Plarent Ndreca:
“Dola nga takimi me Erionin.
1. Erioni është transferuar në ambientet spitalore të burgut të Fierit, për shkak të këmbës së thyer, e cila kërkon ende rikuperim dhe trajtim mjekësor. Ndërkohë, po bëhen gati dy javë që kemi kërkuar zyrtarisht kryerjen e ekzaminimit të nevojshëm për të vlerësuar ecurinë e konsolidimit të frakturës. Deri më sot, ky ekzaminim nuk është realizuar, pavarësisht kërkesave dhe udhëzimeve të mjekut që ndjek rikuperimin e tij.
2. Erioni më dorëzoi disa faqe të shkëputura nga ditari i tij personal, ku ka shkruar përgjigjet që i ka komunikuar ministrit të Drejtësisë lidhur me kërkesat e bëra ndaj tij. Këto përgjigje do t’i bëjmë publike.”
