Legjenda braziliane Ronaldinho u rikthye nga pensionimi të dielën, duke luajtur 45 minuta për Ravennan në ndeshjen e Serie C kundër Forlìt, ku regjistroi 28 prekje të topit dhe ndihmoi në realizimin e golit të parë të skuadrës së tij.
Ishte një ditë historike për Ravenna-n, pasi skuadra vendase, që garon në kategorinë e tretë të futbollit italian, Serie C, e pa legjendën braziliane Ronaldinho të rikthehej në fushë me fanellën e saj.
Stadiumi me kapacitet prej 12 mijë ulësesh ishte i stërmbushur, pavarësisht protestave për çmimet e larta dhe pengesave ndaj mbajtësve të abonimeve sezonale, të cilëve iu desh të blinin bileta për këtë ndeshje, pavarësisht të drejtës së tyre për t’i blerë ato paraprakisht.
Rikthimi i Ronaldinhos në fushë, më shumë se dhjetë vjet pas paraqitjes së tij të fundit në një ndeshje zyrtare, ishte pjesë e një partneriteti më të gjerë me presidentin e Ravenna-s, Ignazio Cipriani.
Ravenna e zyrtarizoi nënshkrimin me Ronaldinhon në qershorin e kaluar, kur ish-ylli i Milanit dhe Barcelonës u bë gjithashtu ambasador i markës së klubit nga Emilia-Romagna dhe aksionar i pakicës.
Marrëveshja e tij me Ravennan u prezantua në një ngjarje të organizuar në Miami në qershorin e kaluar, gjatë Kupës së Botës 2026.
Siç pritej, legjenda me numrin 10 në fanellë e nisi nga minuta e parë ndeshjen e sotme kundër rivalit lokal, Forlìt. Dallimi mes dy skuadrave para ndeshjes ishte i konsiderueshëm: Ravenna po lufton për promovim në Serie B dhe renditet e dyta, ndërsa Forlì zë vendin e 15-të dhe shpreson të shmangë përfundimin në zonën e plejofit të rënies nga kategoria.
Ronaldinho, 46 vjeç, ishte futbollisti më i avancuar i Ravennas kur skuadra vendase detyrohej të tërhiqej për t’u mbrojtur, ndërsa në posedim të topit luante si mesfushor ofensiv.
Ai e preku për herë të parë topin rreth minutës së pestë, kur ekzekutoi një goditje nga këndi në krahun e djathtë. Krosimi i tij u largua nga zona nga mbrojtja e Forlìt.
Në total, Ronaldinho regjistroi 28 prekje të topit, përfshirë një pasim kyç. Goditja e tij e dytë nga këndi, po ashtu nga krahu i djathtë, e gjeti një bashkëlojtar brenda zonës dhe e detyroi portierin e Forlìt, Luca Martelli, të intervenonte me një pritje spektakolare.
Sa herë që Ronaldinho e kishte topin në këmbë, tifozët, përfshirë edhe ata në sektorin mysafir, e mbanin frymën. Mbrojtësit nuk tregoheshin shumë agresivë, përveç rastit rreth minutës së 30-të, kur Luigi Palomba përfitoi nga një top i ndalur dhe e shtyu brazilianin me shpatull. Tifozët vendas protestuan për pak çaste, ndërsa Ronaldinho bëri të njëjtën gjë disa sekonda më vonë, kur kërkoi të akordohej një prekje me dorë, duke pretenduar se kundërshtari ia kishte ndalur pasimin në thellësi.
Në minutën e 35-të, Ronaldinho u përfshi në aksionin e golit të parë të Ravenna-s, të shënuar nga ish-mbrojtësi i Monza-s dhe Interit, Giulio Donati. Braziliani e pranoi topin në qendër dhe ia pasoi Lorenzo Lonardit, i cili asistoi për Donatin në realizimin e golit të epërsisë.
Ronaldinho iu bashkua bashkëlojtarëve në festimin e golit dhe i luajti edhe dhjetë minutat e mbetura të pjesës së parë.
Me vërshëllimën e fundit të pjesës së parë, të dyja skuadrat u drejtuan për në zhveshtore, por Ronaldinho mbeti në fushë së bashku me bashkëkombësit e tij dhe ish-futbollistët e Milanit, Dida dhe Serginho.
Ai kaloi disa minuta duke përshëndetur tifozët në tribunën pas portës dhe në shkallët e stadiumit, të cilët e duartrokitën.
Pasi kishte zhvilluar vetëm një stërvitje me bashkëlojtarët e Ravennas, në prag të ndeshjes, Ronaldinho u largua nga stadiumi gjatë pjesës së dytë. Vendasit shënuan edhe një gol tjetër, duke vulosur fitoren 2-0 ndaj rivalëve lokalë.
“Kaloi shumë shpejt; kështu ka qenë gjithmonë futbolli për mua”, tha braziliani për “Sky Sports” gjatë pushimit mes pjesëve.
“A ishte kjo ndeshja ime e fundit? Nuk e di, nëse presidenti vazhdon të më thërrasë, do të kthehem! Është gjithmonë kënaqësi. I thashë presidentit se, nëse ka nevojë për mua, atëherë do të jem këtu”, shtoi ai.
