Dështimi i takimit të 14 shtatorit mund të prodhojë pasoja për Kosovës, sipas njohësve ndërkombëtarë e vendorë të çështjeve politike. Ata i kualifikuan si të larta gjasat për zbatimin e masave ndëshkuese shtesë, shkaku që nga ndërmjetësi i dialogut pala kosovare është mbajtur përgjegjëse për mosarritjen e një ujdie. E kjo, sipas tyre, rrezikon ta dëmtojë pozitën e Kosovës në arenën ndërkombëtare
Mundësinë e përballjes së Kosovës me pasoja në zbatimin e masave ndëshkuese shtesë, shkaku i dështimit të rundit të fundit të dialogut me Serbinë, e kanë kualifikuar si të lartë njohës ndërkombëtarë e vendorë të çështjeve politike.
Takimi i 14 shtatorit në Bruksel, midis kryeministrit Albin Kurti e presidentit serb, Aleksandar Vuçiq, u përmbyll pa një rezultat, e në Bashkimin Evropian përgjegjëse për dështim e mbajtën Kosovën. E çështja e heqjes apo e zbatimit të masave shtesë, sipas burimeve në BE të Radios Evropa e Lirë, është ndërlidhur me rrjedhën në dialog.
Daniel Serwer, profesor në universitetin “Johns Hopkins”, thotë se pas takimit të së enjtes gjasat për masa shtesë janë të mëdha, porse shton që për të, ato do të ishin të pajustifikueshme.
“Unë mendoj se ka gjasa, megjithëse do t’i konsideroja masat e tilla si të pajustifikuara. Prishtina ka paraqitur një propozim të arsyeshëm që me sa duket nuk është diskutuar. BE-ja dhe Serbia duan të diskutojnë Asociacionin, pa marrë parasysh çështjet e rëndësishme për Kosovën. Kjo nuk do të funksionojë”, ka thënë Serwer.
E politologu Dorajet Imeri shpreh shqetësimin se masat që mund t’i shtohen Kosovës do ta dëmtojnë pozitën e saj në arenën ndërkombëtare.
“Mundësia që të shtohen masat ndëshkuese në raport me atë se çfarë u tha nga këta zyrtarë është relativisht e lartë. Natyrisht që këto masa do të ndikojnë relativisht shumë në procesin e forcimit të subjektivitetit politik të Kosovës dhe mundësia që të dëmtojë, po ashtu, pozitën ndërkombëtare të Kosovës është relativisht e madhe”, ka deklaruar Imeri.
Ai e shprehu shqetësimin edhe për dallimet në qëndrime midis BE-së dhe Kosovës, të shprehura pas takimit të fundit.
Për këtë shkak, analistit Visar Xani thotë se Kosova duhet ta gjejë një gjuhë të përbashkët si me bllokun evropian ashtu edhe me Shtetet e Bashkuara, në mënyrë që të mos jetë pala e ndëshkuar.
“Për Kosovën është me rëndësi që ta marrë këtë takim shumë seriozisht, që qasjen e BE-së ta trajtojë në mënyrë serioze, për shkak se mund të ketë pasoja për të ardhmen, por që të hapë rrugën e bashkëpunimit dhe koordinimit, me qëllim që të mos vazhdojë edhe më tutje që Serbia të pasqyrohet si palë e cila është bashkëpunuese e duke mos u ndëshkuar, duke marrë ndëshkime vetëm Kosova”, ka thënë Xani.
Në BE kanë bërë të ditur se heqja e masave ndëshkuese ndaj Kosovës, të vendosura shkaku i tensioneve të fundit në veriun e banuar kryesisht me serbë, është e varur nga ecuria e dialogut dhe nga konsultime lidhur me to, që shtetet anëtare pritet të kenë gjatë javëve në vijim.
Të enjten e 14 shtatorit, Kosova e Serbia nuk u pajtuan për sekuencimin e zbatimit të marrëveshjes të arritur në Bruksel dhe të aneksit të saj të dakorduar në Ohër.
Plani i Kosovës nuk u pranua nga Serbia e BE-ja. E për planin e konsensusit të prezantuar nga BE-ja, Kurti tha se ishte kushtëzim i zbatimit të gjithë marrëveshjes me Asociacionin e komunave me shumicë serbe dhe akomodim i kërkesave të Serbisë.
