EMA (Agjencia Evropiane e Barnave) ka ngritur alarmin për disa prodhime të falsifikuara Ozempic. Stilolapsa të rreme të ilaçit të diabetit, që përdoret gjithashtu për humbje peshe, janë zbuluar në shitës me shumicë në vendet e BE-se dhe Mbretërinë e Bashkuar.
Hetimet vijojnë dhe autoritetet bëjnë thirrje për kujdes maksimal.
Pikërisht popullariteti i madh i këtij medikamenti, i cili ndonjëherë është i paarritshëm, ka shtyrë disa prodhues të pandershëm të vendosin në treg edhe të falsifikuara.
Në komunikatën e lëshuar nga EMA, në fakt, nënvizohet se janë identifikuar stilolapsa të para- mbushur, të etiketuara në mënyrë të rreme si Ozempic (semaglutide 1 mg, tretësirë për injeksion).
Këto, me etiketa në gjermanisht, u zbuluan në disa shitës me shumicë në Bashkimin Evropian dhe në Mbretërinë e Bashkuar.
Por çfarë përmbajnë këto stilolapsa fallco Ozempic?
Nuk është shumë e qartë, por autoritetet gjermane tregojnë ndryshimin midis paketimit origjinal dhe atyre të falsifikuar (siç mund ta shihni nga foto).
Siç theksojnë ekspertët, ky është një problem serioz, duke qenë se Ozempic-u i vërtetë është bërë i famshem dhe i përdorur gjerësisht në fushën e humbjes së peshës, pavarësisht se fillimisht ishte projektuar për trajtimin e diabetit të tipit II.
Është e rëndësishme të theksohet se abuzimi me këtë ilaç mund të çojë në reaksione negative të rrezikshme.
EMA zbuloi falsifikimin falë një sistemi kontrolli që përfshin barkode 2D dhe numra serialë unik në çdo paketë ilaçesh të shitura në Bashkimin Evropian, një sistem që lejon gjurmim më efektiv.
Praktikisht, gjatë skanimit të stilolapsave të falsifikuar të Ozempic, u pa se numrat serialë nuk përputheshin me ata autentikë, duke shkaktuar kështu alarmin për falsifikimin e mundshëm.
Autoritetet rregullatore gjermane dhe austriake kanë nisur gjithashtu procedura për deklaratat e mospërputhjes me praktikat e mira të shpërndarjes për tregtarët me shumicë të përfshirë, të cilët dukshëm nuk kanë ndjekur procedurat e vendosura të sigurisë.
