Gazetari shqiptar në Maqedoninë e Veriut, Arben Ratkoceri, ka thënë se Prishtina zyrtare nuk duhet të përzihet fare në zgjedhjet që do të mbahen në maj atje.
Ai tha se shqiptarët nuk e kanë luksin që të bëjnë bashkëpunime me parti të caktuara, qoftë në Kosovë apo në Shqipëri.
“Nëse Prishtina zyrtare nuk është e kujdesshme në këtë çështje, nëse shqiptarët në Maqedoninë e Veriut s’kanë unitet, atëherë mund të ndryshojnë shumë rrethana politike brenda në Maqedoni”.
“Rekomandimi im është që në çështjet e shqiptarëve brenda në Maqedoninë e Veriut, Prishtina zyrtare nuk duhet të përzihet fare, pra lë të jetë zgjedhje e shqiptarëve të Maqedonisë”, tha Ratkoceri në Rubikon në Klan Kosova.
Ai e përmendi edhe rastin e kryeministrit të vendit, Albin Kurti, dhe partisë së tij, Lëvizjes Vetëvendosje, ku tha se është ende e paqartë nëse kjo parti do të garojë në Maqedoninë e Veriut.
