Për shkak të kërkesës së mbrojtjes për përjashtimin e dy gjyqtarëve nga Këshilli Gjyqësor, seanca e sotme publike për rastin “Monstra” në Gjykatën e Lartë është shtyrë. Sipas mbrojtjes së të akuzuarve, dy gjyqtarët, pjesë e Këshillit Gjyqësor, sipas dosjeve të lëndës, tashmë kanë vendosur për të njëjtën.
Pas kësaj kërkese, gjykata, duke sqaruar se nuk ka inspektim të lëndës nga dy gjyqtarët, vendosi të shtyjë seancën deri më 14 qershor për të kryer kontroll dhe për të marrë vendim.
Ankesat e pesë të akuzuarve në rastin “Monstra” janë refuzuar si të pabazuara nga Apeli, ndërsa aktgjykimi i shkallës së parë është modifikuar vetëm në lidhje me llogaritjen e masës së paraburgimit që të akuzuarit e kanë kaluar.
Gjykata e shkallës së dytë i konfirmoi dënimet e të akuzuarve, gjegjësisht burgim të përjetshëm për Alil Demirin dhe vëllezërit Agim dhe Afrim Ismailoviq. Në aktgjykim të plotfuqishëm u vërtetua dënimi për Haki Azirin, i cili u dënua me nëntë vjet burg dhe Fejzi Aziri me 15 vjet burg. Vetëm i pandehuri Sami Ljuta u lirua nga akuzat.
Ndryshe, për vrasjen e pesëfishtë që ndodhi më 12 prill 2012 në afërsi të liqenit të Smilkovës, kur u vranë Filip Slavkovski, Aleksandar Nacjevski, Cvetanço Atskovski, Kire Trpkovski, si dhe peshkatari Borçe Stevkovski, me burg të përjetshëm janë dënuar Alil Demiri, Agim Ismailoviq dhe Afrim Ismailoviq, ndërsa me nëntë vjet u dënua Haki Aziri.
Për rastin “Monstra” ka pasur dy gjykime pasi në vitin 2017, Gjykata e Lartë e ktheu lëndën në rigjykim.
