Një ditë pas takimit të patriarkut serb dhe peshkopëve të Kishës Ortodokse Serbe me liderin suprem serb, Aleksandar Vuçiq, Kuvendi i KOS-it, duke marrë kompetencat e një organi politik, del me një kumtesë politike, me të cilën pretendohet se çdo pranim, i tërthortë apo i drejtpërdrejtë i pavarësisë së Kosovës do të ishte “në kundërshtim me të drejtpërdrejtë me të drejtën ndërkombëtare, Kartën e OKB-së dhe aktet dhe parimet e tjera”.
“Një gjë e tillë nuk mbështetet nga Këshilli i Sigurimit i OKB-së dhe as nga “shumica” e vendeve në botë, përfshirë pesë vendet e BE-së. Kjo në mënyrë të pashmangshme do të shkaktonte shtimin e shpërnguljes së popullit serb dhe do të bënte të pamundur jo vetëm bashkëjetesën paqësore të të gjithëve, pavarësisht nga origjina etnike dhe religjioni, por edhe vetë mbijetesën e popullit tonë në “vatrat e tij shekullore”. Prandaj zgjidhjet duhet të kërkohen ekskluzivisht në respektimin e parimeve që vlejnë njësoj për të gjithë në botë”, ka kumtuar Kuvendi i Kishës Ortodokse Serbe.
“Është e qartë se qëllimi i institucioneve të Kosovës është të krijojnë një Kosovë etnikisht shqiptare në të cilën vështirë se mund të ekzistojë një jetë e lirë dhe normale për serbët. Kisha dënon të gjitha sulmet ndaj popullit serb, shenjtëroreve dhe pronës së tij, veçanërisht “sulmet e armatosura terroriste” ndaj serbëve individualë, duke përfshirë fëmijët, si dhe “krijimin e listave sekrete” në bazë të të cilave serbët, madje edhe ish-pjesëtarë të policisë së Kosovës, arrestohen dhe ndalohen. Po kështu, toka në pronësi të serbëve shpronësohet në “mënyrë të paligjshme”, me qëllim të presionit shtesë ndaj tyre dhe duke i detyruar të largohen”, pretendohet në kumtesën e Kuvendit të KOS-it.
