Kryetari i Partisë Socialdemokrate, Dardan Molliqaj, ka thënë se draftstatuti i hartuar nga ndërkombëtarët për Asociacionin e komunave me shumicë serbe nuk lëviz, pasi kryeministri Albin Kurti u ka thënë “po” atyre.
“Për strategji nuk po flas sepse pasojat do t’i shohim më vonë, çka nëse i del strategjia gabim? Naiviteti më i madh është kur ti pranon çështje të këqija për ty duke llogaritur në strategjinë që tjetri nuk i pranon, sepse këto janë obligime tona. Për SHBA-në, për BE-në, për Francën, draftstatuti që i ka thënë Kurti po para liderëve evropianë, është draftstatut që nuk e rrëzon më askush, përveç nëse merremi vesh ndryshe Kosova me Serbinë, ose nëse Kosova thotë se nuk më intereson fare as BE-ja, as SHBA-ja, përndryshe ai është draft i cili nuk lëvizë”, ka thënë ai të enjten në “Konfront” të KTV-së.
Molliqaj më tej ka thënë se Asociacioni dhe Kosova janë palë të barabarta përball një arbitrazhi
“Kemi kaluar nga selia në qendër administrative të Asociacionit, qendra administrative kanë shtetet, krahinat, autonomitë, komunat. Kemi kaluar nga një qytet që do ta zgjedhin për seli në një qytet që është qendër administrative, që është kryeqyteti. Kurrë nuk është folur për kufi. Tashmë autonomia ka kufi. Kufijtë e autonomisë thotë se janë kufijtë e komunave të Kosovës. Asociacioni ka kufij teknikë territorial që e bëjnë elementin e tretë”, është shprehur ai.
Sipas tij, pa Kurtin nuk do të bëhej autonomia e veriut të vendit.
“Kam thënë se kjo qasje do ta detyrojë Kosovën të pranojë një autonomi dhe ja ku jemi sot. Albin Kurti për targa ia ka dhënë autonominë Kosovës. Serbia ka përdorur veriun, targat e çdo gjë për ta marrë Asociacionin. Albin Kurti i ka përdorur targat, dokumentet e udhëtimit, Policinë, zgjedhjet, kryetarët e komunave që mos ta bëjë Asociacionin. Rezultati është që Asociacionin e ka pranuar Kosova dhe draftin e saj. Adem Demaçi ka thënë se pa Millosheviqin mund edhe të mos çliroheshim. Mos harroni, pa Albin Kurtin nuk do të bëhej autonomia në veri. Jo që ai dëshiron t’ua bëjë autonominë serbëve, por sjellja e tij e ka unifikuar bashkësinë ndërkombëtare në bllok dhe të ka thirrur si nxënësin në takim dhe ka thënë ky është drafti merre ose lëre, ky e ka marrë”, ka thënë ai
