Kryeministri Edi Rama ka lëshuar një paralajmërim të fortë ndaj punonjësve të institucioneve të legalizimit dhe regjistrimit të pronës, duke deklaruar se ata që kanë firmosur legalizime të paligjshme në hapësira publike do të përballen me masa penale.
Në një reagim në rrjetet sociale, Rama publikoi një foto të një lokali të ndërtuar në zonë publike, së bashku me dokumentin e anulimit të legalizimit për atë hapësirë. Ai theksoi se qeveria është e vendosur të vijojë aksionin për lirimin e ambienteve publike të zëna në mënyrë të paligjshme, si pjesë e reformës për kontrollin e territorit.
“Jo vetëm që do të reagohet me zero tolerancë duke i anuluar ligjërisht këto dokumente, por do të miratohet së shpejti edhe një masë për ndëshkimin penal të të gjithë atyre nëpunësve të ALUIZNI-t apo të Kadastrës që kanë firmosur për këto legalizime kriminale në mes të lagjeve të qyteteve tona”, – deklaroi Rama.
Sipas tij, bëhet fjalë për raste flagrante, ku hapësirat publike janë uzurpuar për qëllime fitimi personal, me miratime zyrtare që kanë shkelur ligjin dhe interesin e komunitetit.
Ky paralajmërim vjen në kuadër të një aksioni të gjerë të qeverisë për pastrimin e hapësirave publike, sidomos në zonat urbane, ku prej vitesh janë ngritur struktura pa leje që kanë marrë më vonë mbështetje institucionale përmes proceseve të dyshimta legalizimi.
Reforma e re synon jo vetëm largimin e ndërtimeve pa leje, por edhe vënien përpara drejtësisë të zyrtarëve përgjegjës, në përpjekje për të rikthyer besimin në administratën publike dhe për të mbrojtur hapësirat e përbashkëta të qytetarëve.
