Deputetja e LDK-së, Janina Ymeri, ka replikuar me ministren Artane Rizvanolli sa i përket çështjes së prodhimit të energjisë elektrike dhe infrastrukturës energjetike në vend.
Ymeri i ka thënë ministres që të konsultohet me raportet që publikohen nga vetë shteti dhe më pasë të dalë e të flasë në foltore.
“Është mirë me i pa pak do raporte, jo vetëm me nejt me disa këshilltar, është mirë me u konsultu me raportet që t’i i ki prej KEK-ut. Ki rënie të prodhimit oj zojë. Këqyri raportet mirë e del e fol”, ka thënë Ymeri.
Deputetja e LDK-së ka folur edhe për një tender që Qeveria ia ka dhënë një kompanie greke për t’u këshilluar sa i përket termocentralit A3.
Ajo ka akuzuar LVV-në se e kanë kapur sektorin e energjisë e madje edhe “e kanë sabotuar” që nga ardhja e tyre në pushtet.
