Derisa edhe pak ditë kane mbetur nga afati që Gjykata Kushtetuese i ka dhënë Kuvendit të Kosovës për të zgjedhur presidentin e ri apo vendi t’i nënshtrohet automatikisht zgjedhjeve të parakohshme, deputeti i Lidhjes Demokratike të Kosovës, Ermal Sadiku, parti me të cilën dështuan negociatat e Vetëvendosjes për t’i dhënë vendit një emër të ri për kryetar shteti, ka treguar në “RTK Prime, disa nga arsyet se pse LDK-ja refuzoi ofertën e kreut të Vetëvendosjes, Albin Kurti.
Sadiku tha se ka humbur besimi dhe fryma e bashkëpunimit me Vetëvendosjen.
Madje ai ka treguar edhe një nga arsyet, por që tha të mos jetë e vetmja se pse LDK-ja i tha jo Vetëvendosjes për bashkëpunim.
Ai e quajti manipulim ofertën e kreut të LVV-së e kryeministrit Kurti, duke thënë se qëllimi i tij ka qenë vetëm për të zgjedhur president Glauk Konjufën.
“Është e pavërtetë, ai atë e bënë të manipulojë, me e votuar president Glauk Konjufcën, me hy në Qeveri tre apo katër ministra të LDK-së, e pas një muaji me t’i heqë ata ministra nga puna. Veç e ka bërë njëherë këtë punë”, tha deputeti Sadiku.
I pyetur nga politologu, Dorajet Imeri, nëse kjo është arsyeja pse LDK-ja nuk e pranoi ofertën, ai tha se nuk është vetëm kjo.
“Nuk është kjo e vetmja arsye, arsye tjetër themelore është që nuk lejojmë që një parti politike të ketë kontroll total të shtetit. Nuk ka gjë më patriotike se me tentuar me e ndalë këtë, kur po them me ndalë, është për të balancuar pushtetin me shtet”, tha deputeti i LDK-së, Sadiku.
Ai tha se njëherë këtë e kishte bërë Kurti, duke e prishur marrëveshjen politike me LDK-në.
“Kurti e ka prishur bashkëpunimin me LDK-së, e ka prishur një marrëveshje politike që ka qenë në momente shumë të vështira. Si me i besuar një personi që i ndërron fjalët”, tha ndër të tjera ai.
Sadiku tha e Kurti i ofroi LDK-së pozitën e kryeparlamentarit, për të cilën vitin e kaluar nuk lëshonin pe duke shkaktuar bllokadë të gjatë institucionale.
“E bllokuan vendin për 1 vit, ia lanë fajin opozitës, sidomos LDK-së dhe në fund pozitën e kryeparlamentarit për të cilën nuk lëshuan pe, në fund e lëshon për një orë pe, ‘ja merreni tash pozitën e kryeparlamentarit’. Po pse e bllokuat shtetin për 1 vit”, tha Sadiku në RTK Prime.
Ndërkohë, politologu, Dorajet Imeri, tha se gjithë procesi ka qenë me shumë të panjohura.
“Nuk e di si është e mundur që brenda takimit të njëjtë, kemi dy qëndrime të ndryshme të liderëve politikë pas takimit”, tha ai.
Imeri tha se ndonëse Kurti deklaronte pas çdo takimi se LDK-ja është e pamjaftueshme për zgjedhjen e presidentit, megjithatë kjo parti i shkoi prapë në takim, e pikërisht, tha Imeri, shkuarja e Abdixhikut, filloi të shfaqej si një përpjekje personale që të bëhej ai presidenti.
Ndërkaq, analisti, Sadik Zeqiri, tha se LDK-ja dhe PDK-ja kanë bërë mirë që nuk kanë propozuar një emër për t’i hyrë garës për president, sepse, sipas tij, dihet se si do të dilte rezultati përfundimtar
