Kryeministri i Kosovës, Albin Kurti dhe deputeti i PDK-së, Eman Rrahmani, kanë polemizuar mes veti pasi pyetjeve që deputeti Rrahmani ka bërë lidhur me familjen dhe disa aspekte gjinore.
Ish-deputeti i VV’së, Rrahmani në foltoren e Kuvendit e ka pyetur kryeministrin Albin Kurti për konceptim rreth familjes dhe nëse i konsideron familje edhe ata që kanë ndryshuar gjininë, apo ata që kanë lindur fëmijë nga dhurues të spermës.
“Si e shihni ju familjen, kush do ta përbëjë familjen sipas konceptit tuaj? A do të përfshini si familje edhe rastet që sipas ligjit që keni propozuar për ndryshimin e gjinisë, një burrë që ka ndryshuar gjini dhe është bërë grua, ose një grua që ka ndryshuar gjininë dhe është bërë burrë a do ta njihni si familje? A do ta njihni si familje martesën e të njëjtës gjini? A do ta njihni si familje një grua që ka lindur fëmijë nga një dhurues i spermës? Ju keni deklaruar se rreth 10% e popullsisë ka orientim të tillë seksual. Pra, a do angazhoheni si Qeveri për t’i realizuar këto qëllime, pra të drejtat e këtij 10% siç e quani ju”, tha Rrahmani.
Kurti tha se çështjet e ngritura nga Rrahmani nuk janë çështje që i takojnë familjes, por janë çështje gjinore.
“Është e qartë që kjo nuk ishte një pyetje, por një pyetësor. Nuk kam se si t’iu përgjigjjem të gjitha këtyre çështjeve, por ajo që do të them është se në mandatin e kaluar dhe këtë mandat kemi ndërmarrë hapa të qartë dhe të matshëm për të vendosur familjen në qendër të politikbërjes shtetërore. Këto masa përfaqësojnë ndryshim thelbësor në çasjen e shtetit ndaj familjes, nga një rol pasiv në mbështetje aktive për mbështetjen e saj, duke kontribuuar në ngritjen e natalitetit dhe përmirësimin e perspektives demografike të vendit. Kemi nisur reformën e thellë të asistencës sociale e cila është në fazë të avancuar, kjo reformë synon eliminimin e padrejtësive, identifikimin e saktë të familjeve në nevojë dhe vendosjen e një sistemi që e mbështet realisht familjen. Çështjet që u adresuan këtu, nuk i konsideroj çështje të familjes, por çështje gjinore”, tha Kurti.
