Federata e Basketbollit e Kosovës ka dënuar sjelljet e papranueshme të regjistruara gjatë dy ndeshjeve të para gjysmëfinale të Play-Off-it në Superligë, të zhvilluara në Pejë dhe Mitrovicë.
Sipas Federatës, gjatë këtyre ndeshjeve janë evidentuar fyerje të organizuara në kor nga tribunat në drejtim të lojtarëve, sjellje që bie ndesh me parimet e respektit, integritetit dhe fair-play që qëndrojnë në themel të garave sportive.
FBK e ka cilësuar veçanërisht shqetësuese ndeshjen në Pejë, ku përveç thirrjeve fyese nga tribunat, janë përdorur edhe sistemet e zërimit të palestrës për të transmetuar mesazhe fyese, pavarësisht paralajmërimeve zyrtare gjatë zhvillimit të takimit.
Federata ka theksuar se një praktikë e tillë është e papranueshme dhe nuk mund të tolerohet në asnjë rrethanë.
Në reagim, FBK ka rikujtuar se përgjegjësia për garantimin e një ambienti të sigurt dhe të respektueshëm bie mbi organizatorët e ndeshjeve, përfshirë kontrollin e sjelljes në palestër dhe menaxhimin e sistemeve të komunikimit.
Federata ka bërë të ditur se ka ndërmarrë masa disiplinore në përputhje me rregulloret në fuqi dhe do të vazhdojë të monitorojë nga afër zhvillimet në fazat e mbetura të garës, duke paralajmëruar se çdo përsëritje e sjelljeve të tilla do të trajtohet me masa shtesë.
Në fund, FBK ka theksuar se mbetet e përkushtuar për zhvillimin e garave sipas standardeve ndërkombëtare dhe vlerave të sportit, duke nënvizuar se respekti dhe integriteti janë parime të panegociueshme.
