Kryeministri i Kosovëa, Albin Kurti, ka publikuar pamje nga vizitat e tij në Paris të Francës dhe Dublin të Irlandës, ku gjatë javës së kaluar thotë se zhvilloi një sërë takimesh me liderë shtetërorë, zyrtarë ndërkombëtarë dhe përfaqësues të institucioneve evropiane.
Kurti ka veçuar takimet me presidentin francez Emmanuel Macron, kryeministrin irlandez Micheál Martin, sekretarin e përgjithshëm të NATO-s Mark Rutte dhe zyrtarë të tjerë, si dhe pjesëmarrjen në Forumin e Paqes në Paris dhe Samitin e Komunitetit Politik Evropian në Dublin.
Ai ka ndarë edhe detaje nga aktivitetet në fushën e inovacionit, arsimit dhe ekonomisë.
Postimi i plotë:
Dje mbyllëm një javë të dendur me takime e aktivitete të rëndësishme në kuadër të vizitave në kryeqendrat e Francës dhe Irlandës.
Në Paris, u pritëm dy herë në Pallatin Élysée, në mbrëmjen e organizuar nga presidenti Macron dhe të nesërmen për takim bilateral; po ashtu, u pritëm nga presidenti i Senatit, Gérard Larcher; në Asamblenë Kombëtare të Republikës së Francës, bashkëbisedova me përfaqësues të Komisionit për Politikë të Jashtme dhe atij për Çështje Evropiane, si dhe u prita në takim nga kryesuesi Bruno Fuchs; në Forumin e Paqes mora pjesë në panelin “Making Peace Last: Rebuilding Societies After War”, ndërsa iu bashkuam lansimit të Deklaratës Politike për Fëmijët; aty u prita nga kryetari i Parisit, Emmanuel Grégoire; u takova me kryeministrin e Armenisë, Nikol Pashinyan; me Përfaqësuesin e Posaçëm të BE-së, Peter Sørensen; diskutuam me personalitete kyçe në organizimin e Lojërave Olimpike Paris 2024; u takuam me përfaqësues të mërgatës; vizituam dhe zhvilluam takime në qendrën e teknologjisë dhe inovacionit STATION F, kampusin më të madh në botë për startup-e; u takuam me personalitete të shquara franceze, miq të Republikës së Kosovës; u takova me dekanen, mbajta fjalë dhe diskutova me studentë në Paris School of International Affairs – Sciences Po; u pritëm në qendrën muzeale dhe të edukimit shkencor Palais de la Découverte; e në Versajë; u takova me profesorin Philippe Aghion, i cili vitin e kaluar u nderua me Çmimin Nobel për Ekonomi; si dhe zhvillova intervista me RFI, Le Monde e France24.
Në Dublin, në nisje të Samitit IX të Komunitetit Politik Evropian (EPC) u prita nga Taoiseach Micheál Martin dhe mora pjesë në tryezën e rrumbullakët me liderë të tjerë pjesëmarrës; në margjina u takova e bashkëbisedova me ministren e Jashtme dhe të Tregtisë të Irlandës, Helen McEntee; me Sekretarin e Përgjithshëm të NATO-s, Mark Rutte; me kryeministrin e Mbretërisë së Bashkuar, Andy Burnham; atë të Kanadasë, Mark Carney; atë të Hungarisë, Péter Magyar; kryeministren e Danimarkës, Mette Frederiksen; presidentin e Zvicrës, Guy Parmelin; dhe Sekretarin e Përgjithshëm të Këshillit të Evropës, Alain Berset. Aty zhvillova një intervistë për Irish Times. Në Houses of the Oireachtas (Parlamentin e Republikës së Irlandës) u pritëm nga përfaqësues të Komitetit për Çështje të Bashkimit Evropian; ndërsa vizita u mbyll me takimin, fjalën dhe diskutimin në Institute of International and European Affairs (IIEA).
