Në një univers alternativ, Ansu Fati do të ishte një nga figurat kryesore të Spanjës në Kupën e Botës 2026 në Amerikën e Veriut.
Shpresat e “La Roja” sot kryesisht mbështeten mbi supet e sensacionit 18-vjeçar Lamine Yamal, i cili ishte vendimtar në triumfin e tyre në Euro 2024 dy vite më parë.
Por para se të vinte Yamali, kishte një tjetër talent elitar spanjoll që doli nga akademia e famshme e Barcelonës, “La Masia”.
Fati, i cili iu bashkua Barcelonës nga Sevilla në moshën 10-vjeçare, u bë golashënuesi më i ri në historinë e klubit në moshën 16 vjeç e 304 ditë, dhe më pas lojtari më i ri që shënoi në Ligën e Kampionëve në moshën 17 vjeç e 40 ditë.
Ky rekord në Ligën e Kampionëve ende qëndron, pasi Yamali e arriti të njëjtin sukses, por 28 ditë më i madh në moshë.
Ai ishte parashikuar si trashëgimtari i fronit të Lionel Messi, me vetë Messin që kishte thënë se talenti “ka gjithçka për t’u bërë një lojtar i madh”.
Kur Messi u largua për te Paris Saint-Germain, Fati mori fanellën ikonike me numrin 10, por dëmtimet e shpeshta ndikuan në karrierën e tij dhe ai përfundoi i huazuar në Premierligë te Brighton & Hove Albioni në sezonin 2023/24.
Më pas ai u rikthye te Barça, por nuk gjeti hapësira nën drejtimin e Hansi Flick dhe sezonin e kaluar u huazua te Monaco, ku shënoi 12 gola në 30 paraqitje.
Në vend që të ishte në Kupën e tij të dytë të Botës me Spanjën, Fati është përfshirë në një drejtim krejt tjetër jashtë fushës së futbollit.
Në “TikTok”, ai njoftoi publikimin e një këngë të re, duke ndarë një fragment të këngës debutuese “Sea como sea” me mbi 2.2 milion ndjekës.
Klipi mori mbi 3 milion shikime dhe rreth 450,000 pëlqime, ndërsa komentet u fokusuan te ndryshimi i papritur i karrierës së tij në moshën vetëm 23 vjeç.
Megjithatë, ai ishte pjesë e Kupës së Botës 2022, ku luajti si zëvendësues nën drejtimin e Luis Enrique.
Por Fati nuk ka luajtur për Spanjën prej afro tre vitesh, me ndeshjen e tij të fundit që ishte në tetor 2023 ndaj Norvegjisë.
Ai gjithashtu ka një pasion për muzikën dhe ka kontratë shpërndarjeje me “Music Brokers”, pjesë e “Sony Music”.
Sipas raportimeve, ai mund të transferohet përfundimisht te Monaco, pasi klubi pritet të aktivizojë opsionin e blerjes prej 11 milionë eurosh
