Mbrojtësi i Gjermanisë, Nico Schlotterbeck, është përjashtuar nga pjesa e mbetur e Kupës së Botës pasi raportohet se ka pësuar një këputje të ligamentit në kyçin e majtë të këmbës gjatë fitores 2-1 të Gjermanisë ndaj Bregut të Fildishtë të shtunën (20 qershor).
Schlotterbeck, i cili luan për Dortmundin, ishte titullar si në fitoren 7-1 ndaj Curaçaos, ashtu edhe në suksesin dramatik 2-1 kundër Bregut të Fildishtë.
Megjithatë, ai u zëvendësua në pushimin mes pjesëve të ndeshjes së fundit, pasi u pa duke shfaqur shenja dhimbjeje në fund të pjesës së parë.
Sipas “Sky Germany”, qendërmbrojtësi iu nënshtrua një rezonance magnetike (MRI) të dielën (21 qershor), e cila zbuloi shkallën e dëmtimit. Rezultatet treguan se ai kishte pësuar një këputje të ligamentit kolateral medial.
Schlotterbeck pritet të mungojë të paktën dy muaj. Mbrojtësi i Real Madridit, Antonio Rüdiger, pritet ta zëvendësojë atë në formacionin titullar të trajnerit Julian Nagelsmann për ndeshjen e Gjermanisë kundër Ekuadorit më 25 qershor.
Gjermania tashmë e ka siguruar kualifikimin në fazën e 1/32-ave përpara ndeshjes së fundit të grupit kundër kombëtares amerikano-jugore.
A mund ta zëvendësojë Gjermania Schlotterbeckun?
Jo. Skuadrat e Kupës së Botës mund të ndryshoheshin vetëm deri në 24 orë para fillimit të ndeshjes së parë të secilës kombëtare. Kjo ndodhi, për shembull, me Anglinë, kur Trevoh Chalobah zëvendësoi Tino Livramento para ndeshjes hapëse kundër Kroacisë.
Meqenëse Gjermania ka zhvilluar tashmë dy ndeshje, lista e saj është e mbyllur për pjesën e mbetur të Kupës së Botës, pavarësisht dëmtimeve serioze. Asnjë lojtar i fushës nuk mund të zëvendësohet.
Megjithatë, rregullat e FIFA-s janë të ndryshme për portierët, të cilët mund të zëvendësohen nëse largohen nga turneu për shkak dëmtimi ose arsyeje mjekësore.
Rregullorja zyrtare e FIFA-s për Kupën e Botës 2026 thotë:
“Një lojtar i listuar në listën përfundimtare mund të zëvendësohet nga një lojtar i listës paraprake vetëm në rast dëmtimi ose sëmundjeje serioze, deri në 24 orë para fillimit të ndeshjes së parë të ekipit të tij në FIFA World Cup 26. Çdo përjashtim duhet të miratohet nga FIFA.”
Po ashtu, FIFA sqaron se pas paraqitjes së një raporti të detajuar mjekësor, Komiteti Mjekësor i FIFA-s vendos nëse dëmtimi është mjaftueshëm serioz për ta penguar lojtarin të marrë pjesë në turne.
Lojtarët e zëvendësuar duhet të dorëzojnë akreditimin e tyre te FIFA dhe nuk konsiderohen më pjesë e listës përfundimtare të kombëtares. Lojtari zëvendësues duhet të marrë të njëjtin numër fanelle si lojtari i dëmtuar.
Për portierët, rregullorja shton:
“Një portier i listuar në listën përfundimtare mund të zëvendësohet nga një portier tjetër nga lista paraprake vetëm në rast dëmtimi ose sëmundjeje serioze, në çdo moment gjatë turneut final. Çdo përjashtim duhet të miratohet nga FIFA.”
Kjo do të thotë se Gjermania nuk mund të thërrasë një zëvendësues për Schlotterbeckun, por do të kishte të drejtë të zëvendësonte një portier nëse ai do të pësonte një dëmtim ose sëmundje serioze gjatë turneut
