Pamje të papublikuara më parë nga incidenti mes Lionel Messit dhe stafit të Egjiptit kanë zbuluar një kënd tjetër të një prej momenteve më të diskutueshme të Kupës së Botës.
Në një ndeshje që konsiderohet ndër më spektakolaret e Botërorit 2026 deri tani, Argjentina, kampione në fuqi e botës, siguroi kualifikimin në çerekfinale pas një përballjeje dramatike ndaj Egjiptit.
Egjipti hyri në këtë ndeshje si skuadër jo favorite, por befasoi që në fillim. Mbrojtësi Yasser Ibrahim kaloi “Faraonët” në epërsi pas vetëm 15 minutash lojë.
Vetëm gjashtë minuta më vonë, situata u përkeqësua edhe më shumë për Argjentinën, pasi Lionel Messi humbi një penallti, e cila u prit nga portieri egjiptian Mostafa Shobeir. Kjo bëri që argjentinasit të shkonin në pushim në disavantazh.
Egjipti shënoi edhe një gol tjetër në fillim të pjesës së dytë, por ai u anulua nga VAR-i. Megjithatë, skuadra afrikane e riktheu epërsinë prej dy golash në minutën e 67-të, kur Mostafa Ziko realizoi për 2-0.
Por kampionët në fuqi nuk u dorëzuan. Argjentina realizoi një përmbysje spektakolare me golat e Cristian Romeros, Lionel Messit dhe Enzo Fernandezit, i cili shënoi golin vendimtar në minutën e 93-të për ta dërguar skuadrën në çerekfinale.
Megjithatë, momenti më i madh i ndeshjes nuk ishin vetëm golat. Tensionet shpërthyen pranë stolit të Egjiptit në minutat e fundit të takimit në Atlanta, ku trajneri Hossam Hassan u pa duke bërë një gjest kontrovers me duar në formën e shkronjës “X”.
Trajneri i portierëve të Egjiptit tenton t’i afrohet Messit
Një kënd i ri i incidentit tregon një tjetër anëtar të stafit teknik të Egjiptit duke u mbajtur nga kolegët e tij, teksa dukej se po përpiqej t’i afrohej Messit për t’u përballur me të.
Pamjet, të shpërndara në Reddit, tregojnë Messin duke folur me stolin egjiptian, para se bashkëlojtarët e tij, Lisandro Martinez dhe Leandro Paredes, ta largonin nga situata
One of the Egyptian coaches tries to fight Lionel Messi and gets a red card
byu/TomlinSteelers insports
Por kjo nuk e ndali trajnerin e portierëve të Egjiptit, Saafan El-Sagheer, i cili vazhdoi debatin me kapitenin e Argjentinës. Ai e ndoqi Messin në fushë, duke bërtitur qartë dhe duke u përpjekur t’i tërhiqte vëmendjen.
Në fund, anëtarë të tjerë të stafit teknik dhe disa lojtarë rezervë të Egjiptit ndërhynë, e kapën kolegun e tyre dhe e larguan nga fusha.
Megjithatë, arbitri Francois Letexier nuk e la pa ndëshkim këtë sjellje, duke i treguar El-Sagheer kartonin e kuq për reagimin e tij të ashpër.
Çfarë nënkuptonte gjesti “X” i Hossam Hassan?
Përveç El-Sagheer, edhe trajneri i Egjiptit, Hossam Hassan, u ndëshkua nga arbitri për sjelljen e tij në minutat e fundit të ndeshjes.
Gjatë debatit me zyrtarët e ndeshjes, Hassan u pa duke bërë gjestin “X” drejt arbitrit.
Zakonisht, ky gjest përdoret për të raportuar raste të dyshuara të abuzimit racist, megjithëse nuk është e qartë nëse ky ishte qëllimi i Hassan në atë moment.
Një tjetër mundësi është që Hassan ta ketë përdorur gjestin me të njëjtin kuptim si Jose Mourinho në vitin 2010, kur trajneri portugez, atëherë në krye të Interit, bëri një gjest të ngjashëm në drejtim të gjyqtarit.
Në atë rast, gjesti i Mourinhos u konsiderua “shprehje ofenduese” ndaj zyrtarit të ndeshjes, pasi interpretohej si simbol i prangave. Ai u dënua më pas me tri ndeshje pezullim.
Pas gjestit të Hassan, një lojtar rezervë i Egjiptit ndërhyri, ndërsa më pas vëllai i tij dhe njëkohësisht trajneri Ibrahim Hassan shkoi drejt tij për t’ia ulur duart dhe për ta qetësuar situatën.
Hassan: Sot u trajtuam padrejtësisht
Në konferencën për shtyp pas ndeshjes, Hossam Hassan vazhdoi kritikat ndaj gjykimit dhe mënyrës se si u menaxhua takimi.
“Pse nuk ka drejtësi në sport? Në futboll?”, pyeti ai para gazetarëve.
“Nuk dua ta zbukuroj me fjalë të bukura. Sot jemi trajtuar padrejtësisht. Kemi vuajtur një padrejtësi”, deklaroi trajneri i Egjiptit.
Hassan pretendoi se Egjipti kishte kundërshtuar paraprakisht përzgjedhjen e francezit Francois Letexier si arbitër të ndeshjes. Ai shkoi edhe më tej, duke thënë se në shenjë proteste nuk do të shikojë më asnjë ndeshje tjetër të këtij Botërori.
“Kjo është mënyra ime për të folur dhe për të qëndruar në këmbë. Nuk do të shikoj asnjë ndeshje të këtij turneu”, tha Hassan.
