Ylli i Manchester Cityt, Phil Foden, është bërë objektiv i një transferimi befasues gjatë kësaj vere, sipas raportimeve që vijnë nga Turqia.
Foden, i cili në mënyrë kontroverse mbeti jashtë skuadrës së Anglisë për Kupën e Botës, e ka kaluar gjithë karrierën te Manchester City, pasi doli nga akademia e klubit.
Që nga debutimi i tij në moshën 17-vjeçare, Foden ka zhvilluar 369 ndeshje për klubin e zemrës, duke shënuar 110 gola dhe duke fituar çdo trofe të mundshëm.
Ai pati një sezon të vështirë gjatë edicionit 2025/26 dhe tashmë kanë nisur spekulimet për të ardhmen e tij, ndërsa City përgatitet për një epokë të re nën drejtimin e Enzo Marescas, i cili zëvendësoi Pep Guardiolën.
Aktualisht, Foden ka edhe një vit kontratë me klubin nga “Etihad Stadium” dhe mediumi turk “Fanatik” raporton se Galatasaray dëshiron ta transferojë.
Sipas raportit, gjiganti turk e sheh anglezin si kandidatin ideal për të marrë rolin e numrit 10 në skuadër.
Po ashtu thuhet se 26-vjeçari po ndiqet edhe nga klube të tjera evropiane, ndërsa vlera e tij në treg vlerësohet rreth 70 milionë euro.
Edhe pse Foden është konsideruar gjithmonë simbol i Manchester Cityt, raporti pretendon se ai është i hapur për një largim për shkak të mungesës së minutave gjatë sezonit të kaluar.
Mundësia që Foden të luajë për një klub tjetër është dukur gjithmonë e pamundur, pasi ai kishte shprehur vazhdimisht dëshirën për ta kaluar gjithë karrierën te City. Megjithatë, Galatasaray po shtyn fort për marrëveshjen dhe synon ta ribashkojë mesfushorin me ish-bashkëlojtarët Leroy Sané dhe Ilkay Gündogan.
Agjenti George Gardi, i cili ka lidhje të ngushta me Galatasarayn, thuhet se ka marrë “autoritet të plotë” për këtë operacion dhe ka qenë personi që propozoi fillimisht emrin e Foden si objektivin kryesor.
Galatasaray është në kërkim të një numri 10 të ri, por lista e objektivave nuk përfundon me Foden. Klubi turk raportohet se po monitoron edhe kapitenin e Manchester United, Bruno Fernandes.
Gjithashtu, thuhet se janë zhvilluar bisedime për Can Uzun të Eintracht Frankfurtit dhe Julio Encison, reprezentuesin e Paraguait që aktivizohet te Strasbourgu në Ligue 1.
Pavarësisht spekulimeve që e lidhin me Galatasarayn, në muajin maj raportime të shumta pohonin se Foden kishte arritur një marrëveshje paraprake me Manchester Cityn për rinovimin e kontratës.
“BBC” dhe media të tjera raportuan se ai kishte pranuar kushtet e një kontrate të re katërvjeçare, me opsion për një vit shtesë.
Megjithatë, deri më tani nuk ka pasur asnjë njoftim zyrtar nga Manchester City.
Foden aktualisht po shijon pushimet, duke qenë i pranishëm në Wimbledon dhe në garën e Formula 1 në Silverstone, pasi nuk u përfshi nga Thomas Tuchel në listën e Anglisë për Kupën e Botës.
Ai pritet të rikthehet në stërvitje më 20 korrik, përpara se Manchester City të nisë turneun parasezonal në Azi, ku do të përballet me Interin, K-League All Stars dhe Atletico Madridin në Hong Kong dhe Korenë e Jugut.
Më pas, City do të luajë në Community Shield ndaj kampionit të Premierligës, Arsenalit, më 16 gusht në “Principality Stadium”, ndërsa sezonin e ri do ta nisë më 23 gusht me një transfertë ndaj Bournemouthit.
