Ministria e jashtme britanike ka dënuar deklarimet e ministres Snezana Paunovic për “spastrim etnik të Kosovës”.
Në reagim thuhet se deklarime të tilla vetëm rihapin ndarjet e vjetra në rajon.
“Ne i dënojmë deklarimet e Ministres Serbe Snezana Paunovic, duke përfshirë referencat për spastrimin etnik të Kosovës. Ato janë krejtësisht të neveritshme dhe nuk kanë vend në shoqërinë e sotme.Në një kohë kur vendet në të gjithë Ballkanin Perëndimor janë të përqendruara në ndërtimin e një të ardhmeje paqësore, të qëndrueshme dhe shumëetnike, vërejtje të tilla synojnë të rihapin përçarjet e vjetra dhe të nxisin tensionet. Udhëheqësit politikë përgjegjës duhet ta refuzojnë një gjuhë të tillë qartë dhe pa mëdyshje”, ka thënë një zëdhënëse e ministrisë së Jashtme të Britanisë së Madhe.
Në fund të reagimit thuhet se gjithashtu janë në dijeni për mohimin që presidenti serb Vucic ua ka bërë deklarimeve të saj.
