Protesta në Tiranë kundër investimit në Zvërnec hyri sot në ditën e saj të 96-të.
Qytetarët, pas organizimit në sheshin “Skënderbej”, nisën marshimin drejt Kryeministrisë, ku çdo ditë mbahen fjalimet e organizatorëve dhe pjesëmarrësve.
Protesta nisi fillimisht si reagim ndaj projektit të investimit turistik në Zvërnec, ndërsa përgjatë ditëve të zhvillimit kërkesat e protestuesve janë zgjeruar në çështje politike dhe institucionale.
Protestuesit kërkojnë dorëheqjen e kryeministrit Edi Rama, largimin e asaj që ata e cilësojnë “kastë të vjetër” politike. “Ne kërkojmë ndryshim sistemi”, u shpreh një prej protestuesve gjatë fjalës së tij.
Një tjetër protestuese deklaroi se kundërshtojnë projektin turistik në Zvërnec dhe se nuk do të lejojnë ndërhyrje në zonat e mbrojtura. Sipas saj, protestuesit nuk mjaftohen vetëm me ndryshime ligjore, por kërkojnë largimin e qeverisë. Gjatë protestës u dëgjuan edhe thirrje “Rama në burg, Berisha në burg”.
Protestuesit deklaruan gjithashtu se 7 shtatori shënon ditën e 100-të të protestave dhe kërkuan dorëheqjen e kryeministrit dhe të kabinetit qeveritar.
Gjatë fjalës së saj, një prej protestuesve kërkoi edhe lirimin e personave të arrestuar dy ditë më parë gjatë tensioneve para Kryeministrisë.
Pas fjalimeve në sheshin para Kryeministrisë, protestuesit vijuan marshimin në rrugët e Tiranës
