Një operacion i madh anti-mafia në Itali ka çuar në zbulimin e një “thesari” prej 3.2 milionë eurosh cash, të fshehur brenda mureve të një apartamenti në Caivano, pranë Napolit.
Pamjet e publikuara nga Karabinierët tregojnë efektivët duke shembur muret me çekiçë, derisa nxjerrin pakot me para të mbështjella me celofan dhe të fshehura në kova plastike. Sipas autoriteteve, pjesa më e madhe e shumës përbëhej nga kartëmonedha 50-euroshe. Gjatë kontrollit u sekuestruan edhe disa ora luksoze.
Operacioni përfundoi me arrestimin e 34 personave. Prej tyre, 23 u dërguan në burg, ndërsa 11 të tjerë u vendosën në arrest shtëpie.
Hetimi i drejtuar nga Prokuroria e Napolit dhe Drejtoria e Qarkut Anti-Mafia lidhet me një rrjet të dyshuar të përfshirë në trafik droge, zhvatje dhe veprimtari të organizuara me metoda mafioze.
Sipas Karabinierëve, grupi kriminal dyshohet se drejtohej nga klani Angelino, i njohur për aktivitetin e tij në zonat e Caivano dhe Casoria. Operacioni u zhvillua nga njësia hetimore e Castello di Cisterna, në bashkëpunim me njësitë operative të Caivano dhe Casoria.
