Përzgjedhësi Franco Foda e konfirmoi vendimin në konferencën për media para ndeshjes me Irlandën, duke bërë të ditur se Mërgim Vojvoda do të jetë zëvendëskapiten.
“Kapiteni i Kombëtares do të jetë Vedat Muriqi. E kemi diskutuar këtë edhe me lojtarët. I dyti do të jetë Mërgim Vojvoda”, deklaroi Foda.
Muriqi e ka mbajtur shiritin edhe në të kaluarën, në ndeshjet kur Amir Rrahmani ka munguar. Tash, pas largimit të mbrojtësit nga përfaqësuesja, sulmuesi do ta udhëheqë Kosovën si kapiten i parë.
Foda foli edhe për objektivat në Ligën B të Kombeve, ku Kosova është në grup me Austrinë, Irlandën dhe Izraelin.
“Na presin lojëra të vështira dhe Austria është favorite. Ne kemi qëllime të larta. Në radhë të parë dëshirojmë të mbesim në Ligën B, pastaj, nëse paraqitemi mirë, të vazhdojmë dhe të ngrihemi”, u shpreh ai.
Kosova e nis fushatën të enjten ndaj Irlandës në stadiumin “Fadil Vokrri”, nga ora 20:45
