Portugalia po vazhdon përpara pa u ndikuar nga situata rreth Cristiano Ronaldos. Kështu ka deklaruar Gonçalo Ramos pas fitores 4:2 ndaj Danimarkës, duke insistuar se largimi i superyllit portugez nuk ka ndikuar në përgatitjet dhe paraqitjen e ekipit.
Sulmuesi pati ndikim në suksesin e Portugalisë, ndërsa pas ndeshjes theksoi se skuadra është e bashkuar dhe e fokusuar vetëm te objektivat në fushë.
“Situata e krijuar nuk ka pasur ndikim te ne. Çështjet e jashtme nuk kanë ndikuar në rëndësinë e ndeshjes. Ne duam ta fitojmë çdo ndeshje dhe ashtu bëmë”, ka deklaruar Ramos.
Ai ka vlerësuar gjithashtu punën e përzgjedhësit Jorge Jesus, duke thënë se ekipi tashmë ka ide të qarta për mënyrën se si dëshiron të luajë.
“Trajneri na ka ndihmuar shumë. Kemi ide të qarta, e dimë saktësisht se ku janë bashkëlojtarët, në sulm e mbrojtje. Më pëlqen të luajmë kështu”, ka shtuar sulmuesi.
Në anën tjetër, situata me Ronaldon vazhdon të jetë një prej temave kryesore rreth përfaqësueses portugeze. Jorge Jesus nuk e aktivizoi 40-vjeçarin në ndeshjen ndaj Norvegjisë dhe nuk e kishte planifikuar atë as për përballjen me Danimarkën.
Pas kësaj, Ronaldo u largua nga grumbullimi i Portugalisë, duke e lënë skuadrën pa kapitenin e saj në dy ndeshjet e fundit.
Megjithatë, sipas Ramosit, brenda ekipit fokusi mbetet te futbolli dhe rezultatet, me Portugalinë që synon të vazhdojë rrugëtimin e saj pa u shpërqendruar nga zhvillimet jashtë fushës.
