Senatori brazilian Flavio Bolsonaro është larguar nga vendi për në Shtetet e Bashkuara pas humbjes së tij në zgjedhjet presidenciale të së dielës dhe refuzimit të tij për t’iu bindur një urdhri të gjykatës supreme për të dorëzuar pasaportat e tij, sipas dy burimeve të cituara nga Reuters.
Një zyrtar amerikan i konfirmoi agjencisë se senatori brazilian ndodhet në një aeroplan që udhëton për në Shtetet e Bashkuara.
Flavio Bolsonaro konsiderohej favoriti për të fituar zgjedhjet e së dielës, por u mund papritur nga presidenti i majtë Luiz Inacio Lula da Silva. Të hënën, atij iu dhanë 24 orë për të dorëzuar pasaportat e tij si pjesë e një hetimi për pastrim parash, të cilin ai e mohon. Afati ka kaluar dhe dokumentet e tij të udhëtimit janë anuluar , sipas dy burimeve të tjera.
Babai i tij, ish-Presidenti Jair Bolsonaro, ishte zhvendosur gjithashtu në SHBA pas humbjes së tij nga Lula në vitin 2022, të cilën ai refuzoi ta njihte.
Ai përfundimisht u kthye në Brazil, por më vonë u dënua me 27 vjet burg për komplot për të përmbysur qeverinë. Djali i tij ende nuk e ka pranuar zyrtarisht humbjen e tij. Të dielën, ai tha se do të kërkonte anulimin e rezultatit të zgjedhjeve, duke përmendur akuza për parregullsi në votime. Megjithatë, Partia Liberale njoftoi të hënën se po e njihte fitoren e Lulës.
Një zyrtar i lartë i Policisë Federale të Brazilit tha se Bolsonaro nuk është regjistruar duke u larguar nga vendi përmes ndonjë pike kontrolli zyrtar kufitar.
Eduardo Bolsonaro, vëllai i vogël i Flavio-s, i cili jeton në SHBA, kishte thënë para zgjedhjeve se një humbje do të kërkonte largimin e tij nga vendi.
“Nëse vëllai im nuk fiton, unë jam në favor të largimit të tij nga vendi”, i tha ai podkasterit Steven Crowder në fillim të këtij muaji
