Paneli i Apelit në Gjykatën Speciale ka marrë vendim për rastin e Pjetër Shalës, duke rrëzuar shumicën e pikave të ankesës së tij, por duke gjetur disa shkelje në aktgjykimin e shkallës së parë.
Në përfundim, Apeli vendosi t’i ulë dënimin Shalës nga 18 në 13 vjet burgim.
“Paneli miraton pjesërisht pikat 7, 12 dhe 14 të ankesës, largon pjesërisht pikat 1 dhe 3 të aktakuzës dhe rrëzon apelet e z. Shala për të gjitha pikat e tjera. Cakton dënimin unik me 13 vjet burgim, i cili hyn në fuqi menjëherë”, deklaroi anëtari i trupit gjykues, Kai Ambos.
Apeli anuloi dënimin unik me 18 vjet burgim dhe e dënoi Shalën me 13 vjet burgim, duke ia llogaritur edhe kohën e kaluar në paraburgim.
Shala në këtë seancë ishte i pranishëm përmes video-lidhjes.
Gjykatësi Ambos tha se në shkallë të parë, Shala u shpall fajtorë për tri akuza për krime lufte.
Paneli ka konstatuar se Shala është përgjegjës për veprat penale “Ndalim arbitrar”, “Torturë” dhe “Vrasje” dhe tha se ulja e dënimit nuk nënkupton se ai po lirohet nga pesha e krimeve të rënda që ka kryer Shala.
Shala më 16 korrik të vitit të kaluar ishte shpallur fajtor për krimet e luftës të ndalimit arbitrar, torturës dhe vrasjes së paligjshme dhe ishte dënuar 18 vjet burgim.
Më 2 shtator 2024, Mbrojtja e Shalës dorëzoi njoftimin për apel kundër aktgjykimit.
