Kur fjala është për reforma fiskale, Hekuran Murati zakonisht ecën me shpejtësinë e dritës — vetëm që, ndonjëherë, përplasja me ligjin është e pashmangshme.
Vendimi i fundit i Ministrit të Financave për të fuqizuar një udhëzim administrativ që mundësonte kalimin nga arkat fizike në ato softuerike ka përfunduar në tavolinen e Gjykatës Supreme, e cila e ka shpallur të kundërligjshëm.
Me fjalë të tjera: teknologjia ec përpara, por jo pa ligj. E dëmtuar direkt nga ky vendim ka dalë kompania Enternet Shpk, e cila kishte një kontratë të vlefshme me Ministrinë për furnizimin me arka fiskale fizike — marrëveshje që, me vendimin e Muratit, rrezikonte të kthehej në një kontratë të padobishme në aspektin komercial.
Jo vetëm kaq, por edhe bizneset në tërë vendin e kanë parë këtë hap si një “reformë pa adresë”, duke u ankuar për mungesë të konsultimeve, afate të papërballueshme dhe ngarkesë të shtuar për ATK-në.
Dhe, kur s’ka më vend për koment teknik, vjen ironia klasike. Gazetari Lirim Mehmetaj, në një postim që po shpërndahet me shpejtësi në rrjete sociale, godet me sarkazëm:
“Vendimi i fundit që e ka marrë Hekuran Murati si ministër qenka shpallë i kundërligjshëm. A paramendo, Vetëvendosja këtë person e ka përfaqësues kryesor për interpretim të vendimeve të Gjykatës Kushtetuese.”
Të kujtojmë: nuk është hera e parë që një vendim nga kjo ministri përballet me rezistencë ligjore, por kjo herë duket se i ka vënë një vulë të madhe të kuqe mbi konceptin “vendimmarrje e njëanshme”.
