Presidenti i Iranit, Masoud Pezeshkian, ka deklaruar se vendi i tij është i përgatitur për çdo luftë që Izraeli mund të nisë kundër tij, duke shtuar se nuk është optimist për armëpushimin mes dy vendeve, ndërsa ka konfirmuar se Teherani është i përkushtuar të vazhdojë programin e tij bërthamor për qëllime paqësore.
Pezeshkian i bëri këto komente në një intervistë ekskluzive për Al Jazeera, e transmetuar të mërkurën, që përbën edhe intervistën e tij të parë televizive pas përfundimit të konfliktit 12-ditor me Izraelin muajin e kaluar, gjatë së cilës Shtetet e Bashkuara ndërhynë në mbështetje të Izraelit, duke sulmuar objektet bërthamore të Iranit.
Komentet e tij vijnë ndërsa vendet perëndimore po kërkojnë një zgjidhje për ambiciet bërthamore të vazhdueshme të Iranit pas konfliktit, në mes të raporteve se sulmet ndaj objekteve bërthamore kanë qenë më pak dëmtuese sesa është pretenduar nga Uashingtoni.
“Jemi plotësisht të përgatitur për çdo veprim ushtarak të ri izraelit dhe forcat tona të armatosura janë gati të godasin sërish thellë brenda Izraelit,” tha Pezeshkian për Al Jazeera.
Ai shtoi se Irani nuk po mbështetet në armëpushimin që i dha fund luftës 12-ditore.
“Nuk jemi shumë optimistë për të,” tha Pezeshkian.
“Prandaj jemi përgatitur për çdo skenar të mundshëm dhe çdo reagim të mundshëm. Izraeli na ka dëmtuar, dhe edhe ne e kemi dëmtuar atë. Ai na ka goditur rëndë, por edhe ne e kemi goditur thellë në brendësi të tij – edhe pse po i fsheh humbjet.”
Ai shtoi se sulmet e Izraelit, të cilat vranë figura të larta ushtarake dhe shkencëtarë bërthamorë dhe dëmtuan objektet bërthamore, kishin për qëllim të “eliminojnë” hierarkinë iraniane, “por ka dështuar plotësisht në këtë.”
Më shumë se 900 persona u vranë në Iran, shumë prej tyre civilë, dhe të paktën 28 persona u vranë në Izrael para se të hyjë në fuqi armëpushimi më 24 qershor.
Programi i pasurimit do të vazhdojë
Pezeshkian deklaroi se Irani do të vazhdojë programin e tij të pasurimit të uraniumit pavarësisht kundërshtimeve ndërkombëtare, duke theksuar se zhvillimi i kapaciteteve bërthamore do të bëhet “brenda kuadrit të ligjeve ndërkombëtare.”
“Presidenti Trump thotë se Irani nuk duhet të ketë armë bërthamore dhe ne e pranojmë këtë, sepse ne i kundërshtojmë armët bërthamore — kjo është qëndrimi ynë politik, fetar, humanitar dhe strategjik,” tha ai.
“Ne besojmë në diplomaci, kështu që çdo negociatë e ardhshme duhet të bazohet në një logjikë fitim-fitim, dhe nuk do të pranojmë kërcënime apo diktate.”
Ai tha se pretendimi i Trumpit se “programi ynë bërthamor ka përfunduar është vetëm një iluzion.”
“Kapacitetet tona bërthamore janë në mendjet e shkencëtarëve tanë dhe jo vetëm në objektet,” shtoi ai.
Komentet e Pezeshkianit përputhen me ato të mëparshme të ministrit të Jashtëm iranian, Abbas Araghchi, i cili në një intervistë për rrjetin amerikan Fox News, të transmetuar të hënën, tha se Teherani nuk do ta braktisë kurrë programin e pasurimit të uraniumit, por është i hapur për një zgjidhje të negociuar, përmes së cilës do të garantojë që programi të jetë për qëllime paqësore në këmbim të heqjes së sanksioneve.
Izraeli synoi ‘përmbysjen’ e udhëheqjes
Pezeshkian gjithashtu foli për një përpjekje për atentat ndaj tij gjatë një takimi të Këshillit Suprem të Sigurisë Kombëtare në Teheran më 15 qershor, për të cilin raportet thonë se e ka lënë me lëndime të lehta.
I pyetur për këtë sulm, ai tha se kishte qenë pjesë e një plani të komandantëve izraelitë për të goditur udhëheqjen politike iraniane, në vazhdën e vrasjes së figurave të larta ushtarake, me synimin “të fusnin vendin në kaos për ta përmbysur plotësisht.”
Por ai tha se ky plan kishte dështuar.
Gjithashtu theksoi se sulmet e Teheranit ndaj bazës amerikane Al Udeid në Katar, pas bombardimeve të SHBA-së mbi objektet bërthamore iraniane, nuk ishin një sulm ndaj Katarit dhe popullit të tij.
“Nuk e kemi as në mendje, e as në imagjinatë, që duhet të ketë armiqësi apo rivalitet mes nesh dhe shtetit të Katarit,” tha ai, duke shtuar se kishte telefonuar Emirin e Katarit, Sheikh Tamim bin Hamad Al Thani, ditën e sulmeve për t’ia shpjeguar pozicionin.
“E them qartë dhe ndershmërisht se ne nuk e kemi sulmuar Shtetin e Katarit, por kemi sulmuar një bazë të Amerikës që bombardoi vendin tonë, ndërsa të gjitha qëllimet tona ndaj Katarit dhe popullit të tij janë të mira dhe pozitive.”
