Me fillimin e vitit të ri shkollor më 8 shtator, në Shqipëri hyn në fuqi një rregullore e re e Ministrisë së Arsimit, e cila ndalon përdorimin e telefonave celularë në klasa.
Vendimi, i cili synon rritjen e përqendrimit dhe përmirësimin e cilësisë së mësimit, u është komunikuar shkollave përmes një materiali të ilustruar, ku sqarohen masat që do të zbatohen në rast shkeljeje të rregullit.
Sipas udhëzimeve, nxënësit që shkelin këtë rregull do të përballen me masa disiplinore, ndërsa për zbatimin efektiv të tij është parashikuar bashkëpunim i ngushtë mes mësuesve dhe prindërve.
Megjithatë, rregullorja lë hapësirë edhe për përjashtime: përdorimi i telefonit do të lejohet vetëm në raste të veçanta dhe të justifikuara, si p.sh. për nevoja shëndetësore ose komunikime urgjente të koordinuara me shkollën.
Ministria e Arsimit thekson se ky hap është ndërmarrë për të kufizuar shpërqendrimet dhe për të krijuar një mjedis më të shëndetshëm e të përqendruar në procesin mësimor.
