Takimi trepalësh i kryenegociatorëve të Kosovës dhe Serbisë, Besnik Bislimi dhe Petar Petkoviq, i ndërmjetësuar nga emisari special i BE’së, Peter Sorensen ka përfunduar sot në Bruksel.
Sipas medias serbe Rts, Petkoviq ka deklaruar se ka insistuar për formimin e Asociacionit të Komunave me shumicë serbe, por sipas tij, pala kosovare nuk ishte e interesuar për këtë.
Petkoviq shton se Bislimi nuk dha përgjigje lidhur me atë se a e pranon draft statusin evropian për Asociacionin.
“Nëse nuk ka Asociacion, lind pyetja e mbijetesës së popullit serb në Kosovë. Pra, për ne, kjo tani është një çështje humanitare sepse populli serb nuk mund ta durojë më gjithë terrorin që vuajnë nga policia e Kurtit dhe regjimi i Kurtit. Ia thashë hapur këtë z. Bislimit”, theksoi Petkoviq.
Tutje, kryenegociatori serb deklaroi se formimi i Asociacionit është parakusht për të vazhduar më tutje lidhur me dialogun.
“Bashkësia e komunave serbe përfaqëson një kornizë për mbijetesën e popullit tonë dhe ne do të këmbëngulim në këtë. Ne thamë se parakusht për çdo arsye të mëtejshme në aspektin e hapave të mëtejshëm është të kemi atë asociacionin që kemi pritur për 12 vjet”, theksoi Petkoviq.
Ai theksoi se u diskutua edhe çështja e personave të zhdukur.
“Ne e kemi deklaruar qartë se jemi absolutisht të përkushtuar për zgjidhjen e kësaj çështjeje, kryesisht për të mirën e familjeve që kanë pritur për më shumë se 20 vjet të vërtetën e plotë rreth vuajtjeve të të dashurve të tyre”, tha Petkoviq.
Ai theksoi se Serbia do t’i përgjigjet çdo thirrjeje nga Sorensen por duke shtuar se pala kosovare nuk është e gatshme për asnjë marrëveshje.
“Por problemi është pala tjetër, e cila nuk është e gatshme për asnjë bisedë apo marrëveshje”, tha Petković.
Ai njoftoi se fillimisht pati takim me Sorensen, pasi delegacioni i Beogradit pati takim dypalësh me ekipin e Sorensen, dhe në fund pati bisedime të drejpërdrejta mes Kosovës dhe Serbisë
